ne wêraney dił

From the Book:
Dîwanî Eḧmed Begî Komasî
By:
Ahmad Bey of Komasi (1795-1877)
 2 minutes  703 views
ne wêraney dił, ne wêraney dił
qîblem nigaker ne wêraney dił
dîdem, bîna’îm wêney peřey guł
ladêy perse ḧał, xestey dax ne dił
derdê nêzey sext fêraq bałat
germî meḧrûmî gerd pa û pałat
cewsawe azîz cya bîm ce hem
ce xem hewargey meylit gêrten tem
beden ce dûrît byen we qeqnes
gyan ne cay sexten, nimeyum wedes
werne min te’cîl ya ew bê qerar
ne meskenê wêş nekerden ferar
ne sał û ne mah ne ḧefte û ne şew
ne satê aram, ne deqêqê xew
ne meşum ne çem xało ce dûrît
her êd mewaçûn dax ne mehcûrît
ey şew we sergerd cwanmirdît bam
ya temamim ker ya zû ber temam
emşew esłen wîr beyanît nyen
wêney hêcrê min payanit nyen
şineftim şewan fêraq tûl daro
yekca řeng wey řeng ẍezeb lêt waro
ya felek çarem sya perwerden
ya xeyr tu kilîd subiḧit gom kerden
rořo maçû we řořo û zarî
mer řoy axrî, axir nedarî?
sa, dey, axir ber, ya axir bawer
axir, gyan ce des dûrît xelas ker
şew û řo ce dax zołf û kułim to
dawa û basmen çenî şew û řo
çun şew, şêwey zołf moşkînit daro
ro, kemê şu’a’ cemînit daro
wesergerdit bam awat wastey wêm
cwanîş teskîn nimeyawu pêm
sewgend bew tałî şewan fêraqit
wesozî hêcran ne ałem taqit
dûrî to wey tewr twanam senden
řay qafyey ferd qafłeş benden
maceray axir yewmulmematen
umêd biřyay qeti’ ḧeyaten
«eḧmedPen name» ser ta paş alûdey derden
ya axir wişkaw ser çeşmey ferden