ḧefta û dû qełbezey kujraw!
emşew dway nûstinî êware le derałî tarîkîda
dway nûstinî pêdeşt le pêxefî pûşwî payîzêkî mandûda
dway nûstinî «asos» û kêwe řeş le qûłayîy
dîrokêkî ser be taray le gułî henar çûy, em devereda.
betenya eçme derê bo ewey ḧefta û dû
çiray şî’ir dagîrsênim û her çirayek ekem
be liqî birînêkewe û lejêr her liqêkîşda
sûretêk le ewînî xak û
sirûdêk le baran û pişkoy têkeł û
pexşanêk le cirîwe û dûkełî têkeł û
’eşq û qurbanî bo daruberd exwênmewe!.
emşew dway nûstinî hemûtan
betenya eçme derê û ḧefta û dû kotrî serbałsûrî,
çaw le kûjeke çûy, lenaw řoḧma hełkurmaw
berełła ekem, dway ewey çend tûłê
le qefezey em singeyan bo etrazênim
ta berz berz bisûtên û bedem gimegmî
zayełeyekî şeqjin giřtêberbûy yaranewe
xoyan biken, be ḧefta û dû kune xewnî ew kêwaneda
xoyan biken, be ḧefta û dû małî azadîda.
xoyan biken, be hêlaney lankey ḧefta û dû
zařołey tazezawî em mełbendeda û bo ewey
leser şanî ḧefta û dû goranîman binîşnewe.
ḧefta û dû carîş be dewrî meşxełanekey cestey
em wiłate řapeřîweda, bisûřênewe.
be dewrî şî’ra xul bixon.
be dewrî xema xul bixon.
bîken be zemawendî hełałe
ba sing biden le zîwî řijawî mangeşewî řanye
denûk biden le şûşey řeşî diłî bêwejnan û
lamlîş hełsûn le çiłî werîwî lamlî daykan û
lew serîş ke hatnewe legeł xoyanda
ḧefta û dû qesîdey zeytûnîm bo bihênnewe!.
emşew betenya çun kewêkî serhełgirtû
eçme derê bo ewey le berayîy řûnakîyekî
ḧefta û dû çukłeyîda
leser şanoy hewrêkî nizmî erxewanî
leberdem gułebaxî maykirofonêkî sûr sûrda
ke ḧefta û dû pepûley qirimzîy têy ałabin
leberçawî ḧefta û dû qurbanîy xorinşîn
leberdem ḧefta û dû kełekêwîy biłêsepoşda
ḧefta û dû şî’rî giřgirtû exwênmewe
ḧefta û dû gułdanî piř le piřşingyan leserda qiłp ekemewe
ḧefta û dû carîş legeł ḧefta û dû sinewberda
boyan enûştêynewe
be ḧefta û dû zarî em lûtkaneyş
maçyan ekeyn!.
* * *
řîzyan bestuwe, çirawgekan řê eken û řîzyan bestuwe
cogele narincîyekan, estêre keskekan řîzyan bestuwe û
wa hemûyan benaw gyanî êmeda řet ebin.
em qafłey ’eşqe, em řêçkey kazîwane û
em karwanî birûskane
her yeke û gułehetawêkyan dawe le berokî xoyan
her yeke û wêney małêkî řanye û kołanêkî qeładzê û
mêrgêkî bêtwateyan kirdote milyan.
wa hemûyan benaw řoḧî êmeda řet ebin.
ziryan nawekanyan leser taşeberd heł’ekenê û
baran baweşyan pya eka û
kejekan boyan ebin be kejawe û
deryaçekan awyan bepîrewe eben û
mindałanîş be serumlî em ḧefta û dû tîşkeda
heł’eznên û yarî legeł dest û pencey efsûnawîy
ewanda eken û hemuwîşyan benaw řoḧî êmeda řet ebin!
* * *
xo her ême yadî em şepole kujrawane nakeynewe,
legeł êmeda kenarekanî zê û tavgekanîş yadyan ekenewe.
xo her ême yadî em ḧîle û kuřjine cwanemergane nakeynewe,
legeł êmeda espî berd û cwanûy
kizebakanîş yadyan ekenewe.
xo her ême yadgaryan nagrîne çwarçêwey řojekanman,
legeł êmeda tîşkîş eyangirête dwařoj û
legeł êmeda ’aşiqanîş eyanken be cirîwey xewnekanyan
jinan eyanken be řistebaznî dest û
mindałan eyanken be towî hewr û
cûtyaran eyanken be towî genim û
xwêndikaran eyanken be qełemî řengawreng û
hunermendan eyanken be qełbezey řeng û
şa’îranîş be řêjney wişe!
* * *
emşew betenya eçme derê û wextê hemû şitê binwê
her xom û ḧefta û dû henasey kwêstanî hełqirçawim,
her xom û ḧefta û dû giřey germyanî oqre lê biřawim
min her emşew le asoy em zamaneda
be giře řistem ekem be hełm û ebme haław
be henase sardekanîş ebme kilûy befrêkî kiřumat û
ewsa beser ḧefta û dû kiłpey gułebeřojey çîrokêkda û
beser ḧefta û dû şanoy gułecoda û
beser ḧefta û dû tabloy pêşangayekî koçerda
ebarêm û lenaw mêjûyekî sipîda
minî şa’îr
wek pepûle û wek nêrgiz û gułepemû
wekû çawî sawakanî em devere
bo xom enûm!.
* * *
êwe biřonewe bo nêw jûrekanî xotan!
çaw bibřinewe yadgar û êware temawîyekan
ḧefta û dû gewałe hewrîş biken be serîn ta enûn.
min emşew betenya lem nawçe sîḧrawîyeda
ebme bařêze û tełan tełan esûřêmewe.
ebme pepûle payîze û firmêsk firmêsk esûřêmewe.
ebme çirîke û gerû gerû esûřêmewe
min emewê emşew betenya
ser le laney ḧefta û dû mamzî befrînî em pêdeşte bidem.
ser le hewarî ḧefta û dû bazî yaqûtînî em çyayane
bidem û êwe biřonewe bo nêw jûrekanî xotan!.
min emewê emşew leber çirakanî xwênî
em ḧefta û dû hełoyeda, şî’rêk binûsim
le ḧefta û dû lawe şewq bidatewe
ḧefta û dû dêř bê û ḧefta û dû liqupopî sitranî lê bûbêtewe.
ḧefta û dû cûte çawî keskî pêwe bê
şî’rêk çun bejnî ewan û ḧeyranî ewan bîrneçêtewe
le asosda bibê be tawêre berd û
le kêweřeşda bibê be bergilêye û
le derbenda bibê be nexşî sûr û
lenaw xełka bibê be nan û be awêney ewîn û
dûr û nizîk bibrîskêtewe.
min emşew lem gořistane řûnakeda
gwê le ḧefta û dû şimşałî şehîd egirim.
le dwayîşda bo sibey şew
egeřêmewe nawtan û be dirêjî wekû sîrwan
be dirêjî wekû enfal
haje be hajey zamyan û
tinok tinokî çawyan û
lerelerey henaseyan egêřmewe.
êwe biřonewe małê û legeł payîz
serken be diłî yektirda,
minîş eçim bo lay yaranî řapeřîn û
bo lay ’aşiqanî berd û
nîştimanî şî’rekanim!.