sałî taze

ew kêłgeyey, maç baranî sałî parim
sewzî nekird emsał eykem
hewrê way wit.
ew gułe cwaney par nemda le egrîcem
emsał eydem, baxê way wit.
ew direxte şoxuşengey
par letekya hełnepeřîm
emsał bo xom destî egirim
şemał way wit.
ew tacî giřî newrozey par kirdime ser
biçûktir ebê le tacî sałî tazem
lûtke way wit.
ew coganey par çawbiřkêm legeł kirdin
emsał eçme xwazbênîyan
gomê way wit.
ew asoyey par tya nefřîm
emsał ebê be cêy geştim
melê way wit.
ew ḧerfe çaw řeşaney par nem’enasîn
emsał wekû řiste bazin
eyankeme herdû destim
kîjołeyekîş way ewt.
ew denke genmey sałî par nemgeyande
naw şarekem
ebê emsał bîgeyênim
mêrûleyekîş way ewt.
ew gêjeney par xom lêda û geřamewe
le sałî nwêda eybiřim
espêk way wit.
momekanî her dwanze pencey emsałim
şewqî hîwayan geştire le hîy parim
sînîy ser mêzekeş way wit.
ew şî’re sirke kêwîyey wekû ask
par nemtiwanî destemoy kem
par nemtiwanî legeł çawma řaybihênim
sałî taze małîy ekem
sałî taze eyxeme naw hewrebanî
keşkołewe û
le baxełma eyxewênim
dway hemûyan minîş wam wit!.