şêrî kurd
From the Book:
Dwanî Şêrî Şehîd Osman Ozêrî
By:
Osman Ozeri (1936-1966)
3 minutes
565 views
bexêr bêytewe ser herdû çawan taqe qareman
ey têkoşer û aza û becerg, şêrî kurdistan
diłim beřewřûy pîryetî eřoy, bêzar bû le xoy
be zułim û zorî çînî zordaran şika pelupoy
bełam ke katê mijdeyan damê wekû peyamê
be hatnewet diłim geşawe çeşnî îlhamê
îlhamêk diłim cwan bikatewe her lew katewe
mijdeyan hêna bo kurdewarî to geřaytewe
geřaneweket karî kirde dił wekû bonî guł
diłî mest kirdim wek bulbul mest ka leser popey çił
be hestî bonî ew gułe cwane xêra şêtane
dest ka be sozî awazî şadî lew ser çiłane
herweha diłim kewte goranî şêwey soranî
yan lepiř eykird be syaçemane yan badînanî
îtir le tawa xo ney’ezanî bebê penhanî
kam şêwey kurdî bikat be awaz be şadmanî
ewîş le xoşîy hatnewey to hemû xem û so
le diłî hemû kurdan çuwe der çunke ta emřo
xefetî zorman her dûrîy to bû diłman piř so bû
wa ew pejarey kurd û kurdistan wek ka beba çû
êstake cejne, cejnî gelî kurd, newey madî kurd
cejnî ewaney qurbanîyan da û her xebatyan kird
bo geyştine řojî azadî be namuradî
zor genc û pîr û minał û sawa le newey madî
le řêy xebata xwênawyan řêja, azaryan çêja
hergîz nebezan, qet kołyan neda, darêkyan nêja
nawyan na darî azadî, řwa, be xwên aw dira
ewen betîn bû be tewrî zordar qet ne’ebřa
gułî ew dare bo kurd awat bû, dyarîy xebat bû
toze bonêkî bo azadîxwah wekû xełat bû
le mangî temûz, řojî çwardemîn tîşkêkî betîn
gułekey pişkiwan, awat hate dî, nema girye û şîn
hemû serbest û azadîn êsta, jêrdestî nema
laşey zordaran her be destî gel wirduxaş kira
seday azadîy gelî şadman geyye keşkeşan
tirs û xof nema, maf be aşkira xoy eda pîşan
toş wêłî destî mam îsti’mar bûy ya hîy zordar bûy
êmet becêhêşt dûr kewtîtewe çunke naçar bûy
bełam behoy cejne şadîye ke azadîye
împiryalîst û zordar topênran serfirazîye
toy qaremanîş her bew hoyewe bew boneyewe
řojî azadî be tîşkî sûrî wek pişkoyewe
pexşan bû beser řûy nîştimana, beser cîhana
geřaytewe bo xakî nîştiman ey şêrî dana
bem geřanewet behar hatewe be awatewe
nîştiman wek bûk xoy řazandewe le ew satewe
gelî ’ebdulkerîmî azadî têkoşer wekû şêrî neř
gelî ’êraqî xiste beheştêk, beheştî huner
hunerî serbestî, azadîy jyan, kamî dił û gyan
fewtanî zułim û řizgarkirdinî gel û nîştiman
her bew hoyewe le wiłatewe dûr nemaytewe
bexêr bêytewe gewrey xoşewîst wa geřaytewe