beboney kuştinî «lomomba»y pêşeway konẍowe
From the Book:
Dwanî Şêrî Şehîd Osman Ozêrî
By:
Osman Ozeri (1936-1966)
3 minutes
421 views
le kurdistanewe bo konẍo
be firmêskî çaw, be xem û xefet
be xwênî cergî kerit û pare û let
be zûxawî dił, be henasey serd
be gişt nasorî henawî piř derd
em pirsenamet wa bo enûsîn
be qeytanêkî řeşîn eybestîn
bo toy enêrîn, be hestimanewe
lenaw cergekey kurdistanewe
êmey gelî kurd, kurdî dił piř so
pirsenameman enêrîn bo to
ey nîştimanî berzî beriz’esto
ey konẍoy xwênîn, piř le şîn û řo
bełê ezanîn êsta pîşetan
xebat awête buwe be giryan
naheqtan nagrîn, eger bişgirîn
quřîş bipêwun be diłî girîn
çunke emřoke «patrîs lomomba»
bo geleketan bibuwe pêşewa
be destî pîsî împiryalîstan
şehîd bû, kujra, wa çû le kîstan
kuştinî pêşewaş yekcar girane
ême ezanîn çen beso û jane
êmeş wek êwey neberd û aza
deyan pêşeway nebezman kujra
bo heryekeyan heşman epêwa
legeł eweşda her kołman neda
zyatir sûr ebûyn leser têkoşan
leser baweře berzekey ewan
her yek le êmey korpe û leşkiryan
xoy eda be kuşt takû dwa jyan
le řêy řizgarîy kurd û kurdistan
ke bote hîway dûr û nizîkman
řojêk yet tołey giştyan esênîn
ew sa û em sayan webîr ehênîn
lew baweřeşdayn êweş herweha
destiberdar nabin ta dunya û dunya
le xebatî sext berdewam ebin
bergey hezaran kospî wa degirin
tołey lomomba û «morîs mopolo»
xebatkeranî wekû «okîto»
gişt şehîdanî nemrî konẍo
esendinewe le «kaza vobo»
siławyan legeł pirse û matemîn
be diłî pestî piř girye û xemgîn
bo konẍoy řeşpoş řewane eken
be hîway ewey diłnewayî ben
înca be řiq û pîş û qînewe
be diłî germî agirînewe
nařezayîyan bo emerîka
bo ferensay pîs legeł belcîka
bo îngiltere û hemû îsti’mar
we «hemer şołd»y qełbî bedkar
der’ebřiřê, çunke bê’abřiwane
hemûyan hełsan be em tawane
şermyan le hemû serzemîn nekird
her çonêkyan wîst wayan beser bird
gelanî berey azadîxwazan
gişt tê’ekoşin be dił û be gyan
hetakû têkřa lenawyan berin
gelanî jêrdest gişt řizgar eken
kurdîş yekêke le ew gelane
kewa jêrdeste û barî girane
piştî gelanî xebatker egrê
yarmetî eda heta wa bikirê
heta bişgate amanc û awat
her xoştir eka biłêsey xebat