mîrzam pejaran
benay kwen
From the Book:
Şî’rekanî Turkemîr
By:
Turk Amir (1750-1820)
6 minutes
1526 views
mîrzam pejaran...
řûjê je hicûm sewday pejaran
xeyał werdaştem çwî esir waran
řam kefit ew quley kawkiwêsaran
dił meşẍûl seyr, min cinûn we ser
řexiş xeyał tund, řakib bêxewer
ben we ben gêłyam we xatrey xemnak
çenî pay mecrûḧ, sîne û daman çak
ta řam kefit ew pay ’ecayb kûyê
qaf qyametê, keywan şikûyê
kwene qesrê dîm ne quley ferqiş
ferq semawat ne temda ẍerqiş
ne quley ferqiş cêgey kyan bî
cay kyan ew birc baruş ’eyan bî
persam ey benay xirawey xapwîr
ewsa sefabexiş îsake bênwîr
perêm bwaçe herçê mezanî
ba’ist kî bî? kît bî we banî?
kî binyat kerden eywan taqit?
taq biłing bext gerdûn řewaqit
je dewr cemşêr cem ben camnûş
ta ’ehd xesrew xerqey şał ne dûş
şahan yekayek baweř we xatir
bwaçe payey kî bî? je kî zyatir?
kîşan xas xeyał, kîşan lał bexiş bî?
we pay bexşayş kî dił melexiş bî?
ferdê je defter wirdit beyan ker
kirdarê je kar dêrîn ’eyan ker
ta ey şwîm çarey miḧnet kişîde
je lat binûřim çwîn nabdîde
dîm des kerd we şîn zarî řestaxêz
bedter je şîrîn le merg perwêz
ahê tewf serd yexbenan bêzya
yey dûdê je ferq keleş wirêzya
watiş: ey mecnûn perêşan peşêw
we kwanewe deyrîter je dêw
min wêm mezanim cûyay derdanî
je sewday derdan, wêł herdanî
çwîn min kûłebar xem çengit kerden
çwîn min çen sewdat je ser wiyerden
ey eḧwałate mezgim ha pêwe
pełinge neyrim nemenen jêwe
satê sakit bû, gûş der we řazim
řaz derwîn kaw ciger gudazim
bełê, min je esił benay agadim
çen dastanel menin we yadim
je dewr cemşêr, keyqubad çenî
ta ama we dewr humay behmenî
zeḧak wew weqar, wew temkînewe
wew sipay ceřar sehemgînewe
her sał êware, êreş mesken bî
ta îse duřsaq kûy demawen bî
fireydûn wew feř xesrewanîyewe
wew şeqey derefiş kawyanîyewe
wew gurz gaser serişkenewe
wew tewq zeřtar dane û benewe
menûçêhir ne pam kûsiş newaxten
çenî nu qulem tekîyega saxten
çen sał sełim û tûř temenam kerden
ceyşiş çwîn ceyḧûn je lam wiyerden
gerşasp û neyrem, sam û zał zeř
keykawus wew tac cuqey tawus peř
řûsem wew şewket tehemtenewe
wew gurz kûpał nused menewe
keyxesrew wew cam gîtî nimawe
wew murese’ tac řexşan kiławe
wew pałewanan gurz we dûşewe
dił peř kîn je hûn syawşewe
tûs newzer dîm, gîw gûderz dîm
hem cehangîr dîm hem feramerz dîm
wesif kerdinîşan nimeyû ḧisaw
caş nîyen ne pişt dîbaçey kitaw
muxteser yek yek fełek berd we fen
ta yawa we dewr çêhir bin behmen
minîş humay çêhir cerge nazim bî
kwan gişt çwîn ferş pa’enazim bî
min ewsa çirax bezmim řûşin bî
dewr we kam çêhir humay behmen bî
çwînke wars mîrat cem bî
firmanş řewa ḧukimş muḧkem
mahir ustadan senaye’ zana
name pey îḧzar yek yek kyana
we hendek wextê giştişan cem bîn
we şikił û teswîr saxten muḧkem bîn
pencirhî camřêz ne cenb eywan
qesirim efraşten hampayey keywan
ta wextê karim ama we îtmam
nyan benay ’eyş saqîy bade û cam
çenî kenîzan gułberg û gułřeng
terennum sazan şeydaw şûx û şeng
mişterî řuxsar, fitne û şewqi’efrûz
nefîse, hełałe, si’de, cehansuz
gişt ḧûrê ḧûrbeç, ḧûrî sifetan
gişt mehtab cebîn, zuhre tel’etan
senmiber, gułçîn, ḧûrî, perîzad
gułzar, gułenam, gułfam û gułşad
gişt sermest cam, badey eqîq řeng
řeqas pey awaz çeẍaney çilçeng
gişt pakû we deng, dumekçî we def
girgirey gerden siraḧî we kef
menûşan badey ’îneb peyapey
we yad qubad keykawus key
mutirb wew awaz xweş sidayîyewe
wew leḧin û teḧrîr nekîsayîyewe
ewan meqamat le sîneşan bî
barbud bendey kemîneşan bî
newî xewf merg zeřeyê we laşan
bê’enaze bî pûşa bexşaşan
ewan ta dewran we kamşan bî
her we kef, badey gułfamşan bî
fikir nimekerden dunya fanîye
mayeş neyamed peşêmanîye
wêney şułey şem kafurî ne cem
şewan mesûzû, xamûş subḧidem
wew şułey nesîm şefeq zedewe
cem bîdar mewya, şem memerdewe
menîşt ew dilê bezim meyxiwaran
wêş bedir kamił, cem seyaran
min ke humay çêhir cê’enazim bî
kawan gişt çwîn ferş pa’enazim bî
pataq, sehend, qed, hułakû
manişt û gwawran, ben dałahû
quley qendihar, erg sipîd yał
je kanulbeḧreyn ta dem xełxał
simnan, damẍan, sawucbulaẍ û qîs
îrwan, şîrwan, şadbulaẍ, tiflîs
ełberz waḧd, pêç pîrebax
emrûle, ełwen, ben, sawucbulaẍ
pîne, wiştirankû, serendîb temam
baweyał, dînar çenî lengercam
bêstiwîn berz, yafte, elence
qeredaẍ pêwe ta ben gince
kûy ebûqeys, meke û medîne
eqsise, kwan girdîn jey wêne
ye gişt çwîn murîd serisperdem bîn
bełkem kemter seng paye xurdem bîn
we tewrê payey taqim biłing bî
sengê je payem, çene demawen bî
her êwar xirûşt keřenay şêr deng
caşan her we ferq fewq ebleq řeng
giřey taw germ kwîrey bixarî
cem mecmeran ’ûd û ’emarî
meyxiwaran sermest, min we xatircem
kwan çwîn kahê menmana we çem
menîştin ew birc sełtenet ’ezîm
menûşan esas nadre û nedîm
qehqehey quyaqwî lał kemeran bî
nûşanûş bezim badexwaran bî
cem cemşêr’asa mînay bilûrî
sade saqyan fincan feẍfûrî
siday sinc û saz çeng û bûq ’ûd
sûr’asa menîşt ew çerx kebûd
baz her ne siday nałey sinc û saz
çwîn xing fełek menîşt ew awaz
eweł ta dewran we kamşan bî
her fikir badey gułfamşan bî
ewan wew demax teyrimtiraqewe
min wey zimzimey xweş demaxewe
ta axir dewran çerx kec řeftar
nerd bazî terfend lêşan kerd îzhar
seng tefreqe da le mînaşan
sana esasey bezim çinyaşan
we tewrê jey dar û dunya berdişan
çiman hîç newîn hîç nekerdişan
ewan wiyerdin çwîn řêwaran
min menim çwîn seng simkûy sewaran