ẍezaley hezar seyyad peşêwker
From the Book:
Dîwanî Cefayî
By:
Jafayi (1835-1890)
2 minutes
308 views
ẍezaley hezar seyyad peşêwker!
ser delîl dił ’aqił ferîb der!
xeta’î xatir ce xeta xałî!
çiray çiroy sewz naz û delalî!
ahûy perwerdey herdey diłberî!
ẍunçey dił ce boy bê meylî berî!
tetar saray xûy wefa menził!
naf piř şîfa deway bînî dił!
ceyraney ḧeyran ’eyneynit ’ałem!
çêşen mewînûn sitarey tałem?
netoy ewc meylekey towe
tulû’iş serdan dîsan ce nowe?
nûrş munteşîr bî we derûnda
şîfa da we dił xestey zebûnda
xem pergende bî zametan sařêş
derd dił deway şafî yawa pêş
peyk şîrîn pey beyn min û to
meḧrem emîn xidmet şew û řo
peyaman pak meyl wefa co
yawna penem dek dił azad bo!
eweł we goşey ’eynit îşaret
kerdebêt yanê da bêt beşaret
min çenî derdan ce destit ḧasił
dił xerîk nebam seyyad qatił
er wesłen, er fesił, er fereḧ, er derd
meyl û bê meylî şay gerden bê gerd!
her kam bo ce ton, çêşen mecałem?
er her sat sed derd kerî ḧewałem
duwem: îmayê fermabêt we meyl
ew lay telazum beyn meyl û leyl
bełê řewyey min piř ce qisûren
wirne bê meylî ce leylê dûren
bew lefiz şîrîn şeker řêzeket
bew dû dîdey mest nergis bêzeket
fermabêt qesem kerdebêt îzhar
cefayîPen name xestey siftey dił ewgar
’ehdekey qedîm beste ce mabeyn
ebedî ebed neberoş ce zeyn
çenî soz dił ew ten xemîde
her wefam mibo pey ew xem dîde
azîz fîdat bam pey wefa û meylit
pey diłey bê gerd ce mobet keylit
bew bałay ałay serwan xem kerde
bewtuřřey wepay diłda pêç werde
ew şerte çenî soz dił derûn
mişyo çenî řoḧ bişo ew bîrûn