toy meşamî dił
From the Book:
Dîwanî Cefayî
By:
Jafayi (1835-1890)
2 minutes
768 views
toy meşamî dił...
keylen we boyê toy meşamî dił
çi bo? boy ’etir gułan pêş xicił
ney demda meyo ney me’wa û menził
pase te’sîrê perêm kerd ḧasił
ne ’etrî ’ebîr, ne nergis, ne guł
ne boy řyaḧîn ne boy werkemer
wey tewre ce min nekerden eser
mwaçî me’way ahûy xeta’în
cay sefan perê ẍezałey muşkîn
yeqînen me’way sefay diłberen
guzergey qedîm perî peykeren
bo we toy demax diłey cefayîPen name
mesten we boy naf piř ce şîfayî
ye saray xoten wenaf awaşen
mîrẍuzar naz çira me’waşen
cay îzhar meyl leylê terzişen
yagey nimanay bałay berzişen
meḧelil cîlwey cebhey camşen
şu’ley şefeq say subiḧ û şamşen
çêge bî çend car bew cemałewe
gułçîhreş nesay sya małewe
minmana çenî çun şems enwer
ne toy subḧewe şox cîlweger
cew mekaneda bew tîr bew keman
çend gyan we fîrdews kerden şadman
cew ser ’eyne wêş minmana ’eyan
şewq medawe çun zyay new beyan
new ser nehre bî ne new weharda
nûrîn mekerd wêş ne gird neharda
ney gułşen guławpaşî wêş mekerd
perî pyałey ḧesretiş mwerd
letîfî endam nezîf bê gerd
ce xuttey xeyał xasan gird muyerd
çoge we řazan nebat amêziş
çenî badey meyl bezmî diłxêziş
mezaqî zumřey ’aşiqan sercem
şîrîn kerdewe gişt mest û bê xem
nazûn bew diłber ewsafiş êden
zatiş ce afat dûr bo, umêden!
ne her ca carê kerdebo zuhûr
’eksiş baqîyen ta we nefxî sûr
diłberê wey tewr cîlwe nima bo
mişyo min bê ew çêşim tema bo?
erne cyayîş lezzetê berim
dek we cewrî dewr fanî bo serim
er řeza we tîr mujey ew nebam
bipêko cergim ne gird subiḧ û şam
eczay ten we tîr qezay bê beha
pare pare bo ta we întîha