ma ziringey zeng serqetar meyo
From the Book:
Ew Şî’raney Dirawnete Paɫ Mewlewî
By:
Mawlawi Tawagozi (1806-1882)
2 minutes
798 views
ha ziringey zeng serqetar meyo
wêney diłey min nałeş zar meyo
sedaş řêy karwan gêrten pey berden
maçî şagirdî diłey min kerden
hey tucarbaşî xeyr beyo ne řêt
bê řenc wînî genc ne sermayey wêt
min xo keftekar, xerîk derdim
xestey zametdar wêł řûy herdim
diłim yend ce taw zaman nesreften
yekser ce nałey hercaran keften
leylê we mobet werîn nemenden
heway bê bakîş řîşey dił kenden
ce syahî bext, şûmî tałey min
nimazo we goş nałe û lałey min
sa to bo we ’îşq şay serticaran
beşq maye bexiş metay bazařan
diłey min bend ker we pay zengewe
we pay zeng qeder nazk dengewe
ger mekero lutif bo we ser meylda
buyer ne kûçey pay qesir leylda
ta ce tenxiway min dił xestey teng
beyo we feryad çenî zarî zeng
leyl goş do we deng, dił bew zîlewe
beyo we şikat we zelîlewe
’erz kero: qîbley dinya û dînekem
ke’bekey we řas mayey jînekem
hey dad hey bêdad sexten feryadim
sedha zam pêkan namay we yadim
er sed xeşim û qîn řewyey şahanen
keremşan çenî bê gunahanen
azîz ye řewyey ’edałet nîyen
to řeḧimit yekser ce xatir şîyen
nawerî we yad xeşim zebûnîm
ax, her cefat kerd, dax, bît we hûnîm