xwaye bes nebê îtir?!
yadî noyemîn sałî koçî barzanî
From the Book:
Bo Kurdistan
By:
Hazhar (1921-1991)
4 minutes
776 views
barzanî bawik û biray kurd
le şewezenga çiray kurd
hîwa û humêdî kurdistan
řûgey řastî kurdperstan
lem beheştey kurdewarî
çewsan û řenc bexesarî
çend bereman hatîn û çûyn
benî û koyley bêgane bûyn
kes nenas û bê xeber mayn
to řêy şerefit nîşan dayn
beřêberî pêşman kewtî
hîç gawêk tawêk nesrewtî
leherkiwê bûy bohercê çûy
çiqłî diłî namerdan bûy
***
ey ewey bo řizgarî kurd
leřay xwa cîhadit dekird
ey hemîşe leber çawan
cê şanazîy hemû pyawan
ey nimûney azayetî
bê hawta le merdayetî
bê wêne bo emekdarî
řewênî temî hejarî
ey ew merdey ta hetaye
basî çaket biney naye
ger be řwałet ber pêwarî
begyanî pak agadarî
debînî çiman beser hat
de hejmar naye karesat
řewedey zêdî kurdixoran
xwanenas û xawen zoran
şîşawne gyanî geleken
mile deken, pele deken
girêwyane bo nemanman
cařkêşane bo qiřanman
sił naken lexwên řiştinman
bê sûç û tawan kuştinman
hergirtine û ledardane
her mengene û azardane
ber top dane, bombarane
sûtanî gundu şarane
tałane, hest û nist çûne
bedestî załim dîl bûne
enwaman bend û zîndane
giftyan her jeqne û sindane
kêş ke le bendan derçûne
řewîne û lêktir dûrbûne
behezaran û hezaran
wane lenaw mekoy awaran
wek tomî herzin biławîn
bebnyadem nenasrawîn
bab agay le kuř nemawe
xuşk bê bira, kîj bê bawe
zaroman le naz bêbeşin
xuşk û dayk ser beheşin
lemayey jyan beş biřaw
lêqewmaw, aşteba nemaw
her geřew her teşqełeye
her pê wegwêzîn tełeye
***
tenanet zimanekeman
şayetî her manekeman
ke xełatêkî xudaye
lay xwanenas nařewaye
řeway nabînin bîxwênîn
be kurdî yektir bidwênîn
gelî kurd şêst çerxe jîwe
hergîz derdî way nedîwe
***
kake ta to lenawman bûy
hejarperwer bo xuda bûy
êstaş ke çûyte baregay
dyare xoşewîstî xuday
bêje xwaye pişû takey?
bo řuḧmê bew kurde nakey
be bełên û sozdaneket
ke han lenaw qur’aneket
fermûte: «lepaş tengane
norey sanewe û xoşyane
dinya destawdest pê dekeyn
sitemkaran lenaw debeyn
ewpeřî beze lay mine
dest dirêjker pêm dujmine»
***
dey sa kê lem herdu boye
wek kurd şyawî bezey toye
kê lem serzewîye herawe
wekû kurdî lê qewmawe
xwaye ke minit birdewe
be îdrîs tołet kirdewe
îdrîsîşt lê sandewe
birînit lê kulandewe
***
xuda boxatrî xudayît
bo xatrî tak û tenyayît
ba bes bê xo le kurd bwardin
be kełpî gurgan espardin
nizay jinebî û bê bawan
hawar xway řondik le çawan
deryay bezet wecoş bênê
pêl bida û xem biřetênê
ew giş pêşmerge diłpake
řêřewî em řêge çake
ke gyanî xo fîda deken
daway mafî řewa deken
řêgey heqyan girtote ber
begyan bûne lemper laber
des ledes yeka pêkewe
humêdyan be to pitewe
dey toş awiř lêwedanêk
carêk azadane jyanêk
lem yexsîrye řizgarbûnêk
tozêk wek xełkî tir çûnêk
çî tir bê pena nemênin
toy to lebîr çûn neçênin
xwaperistan leyad meke
xuda nenasan şad meke
em seroke û pêşmergane
ke wek tołay poła wane
mes’ûd û yar û hawkarî
weserxe berew řizgarî