yadî mewlewî
From the Book:
Dîwanî Pîremêrd
By:
Piramerd (1867-1950)
2 minutes
790 views
mewlewîm dîbû ewsa ke mabû
le tafî pîrîy êstay mina bû
em çend şî’raney bo becê hêştûm
eykem be tasey ’umrî řaburdûm
wa wadey gopkey sipî pîrîye
gopkey guł diłgîr em diłgîrîye
şikofey baẍçey pîrî sipîye
seraser ser û sînem sipîye
bay mûyek tay mûy sipîmî be ba da
řeşebay pîrî cwanî be ba da
axir beharî newciwanîme
eweł payîzî zîndeganîme
henasem wek bay gełařêzane
tem û dûy derûn gełařêzane
peyda bû zwîrî û zarî û diłgîrî
pey derpey ẍem û pejarey pîrî
xedengî bałam wek keman xem bû
řû le nîşaney ew dinyayem bû
saqî! wa pîrî lêm bû be zincîr
destim dawênit tenha toy destigîr!
zû ke be lencey bê direngewe
be ał û wałay bałay şengewe
be camî cemî cemserî sercem
řegî endamim têk beste be hem
wam gurc kerewe be mestî cwanî
taze katewe em pîrey fanî
pêm bide ta pêm hêzî pê pey ka
bêwçan piley řêy meḧşer tey ka
ax řeşoł! sa toş be qetarewe
ta demirim xotim lê meşarewe