kewte kiłêşem
le sałî 1940da be nawî «debaşanî» yewe biławî kirdotewe
From the Book:
Dîwanî Pîremêrd
By:
Piramerd (1867-1950)
2 minutes
804 views
kewte kiłêşem, kewte kiłêşem
şewêk sewday leyl kewte kiłêşem
perwane’asa, tewafî řûy şem
têkî hełşêla hoş û endêşem
jarî pejarey bê samanme
be zorî şorîy sewday piř sewda
řû bikeme koy yar le nîweşewda
sergonay maç kem le şîrîn xewda
herçîm bête řê le řêgey ewda
xwast û arezûy dił û gyanme
bergî şewgerdî nîlîm kirde ber
peřebelokem lê beste kemer
camane û çeftey surmem naye ser
wek şêrî şerze le lan hatme der
emşew le merg û jîn qeyranme
tîpî zîndewer yekser kiş û mat
kełeşêrî ’erş quqwî nedehat
şewî deycûr bû, mang hełnedehat
hengawim naye řêy hat û nehat
be qełem bazî ’eşqî canane
řêgam lê bûbû be herdey duceyl
ta xom geyane astanekey leyl
dił be endêşey tirs û hewa keyl
geyme xwabgay cananey piř meyl
samî wek payey ’erşî řeḧmane
bê xişpe û bê hest geyme serînî
be neş’ey şêtî hîçim nebînî
demim geyane xałî cebînî
řapeřî witî: to kam bê dînî?
çon geyştîte em cê û mekane?
serî hełbiřî, çawî be min kewt
yexey dadřî, beyanî derkewt
sifîdey beyan ser řeşî şew kewt
hêndey cinêw da tûřeyî sirewt
cinêwî bo min bû be behane
witim: cinêwit xełate bo min
kemendî sewday tom kewte gerdin
wa řam’ekêşê bê bak le mirdin
zîndeganî xom lê bû be duşmin
egîne çîme lem hewłdane
witî: min çî bikem eme ḧałme
be dest min nîye xełk ’ewdałme
hemûy aşûbî çawî kałme
xetay to nîye fîtney xałme
egîna min çîm le ezêtdane?!