le naw řezana
From the Book:
Dîwanî Pîremêrd
By:
Piramerd (1867-1950)
2 minutes
903 views
le naw řezana, le naw řezana
egeřam be naw řistî mêwana
mêwim dî le twêy şêwey ’uryana
girj bûbû le naw gełařêzana
wextî bewerzî terzî xoş terzî
serî berz ekird be bergî sewzî
hêşûy mirwarî gerdinî berzî
be bay ẍirurî şoxî elerzî
tîftîfey eda nimnimey baran
bo tametamey giroy meyxiwaran
gełay bo xeney zułfî nazdaran
tirêkey ebû be dyarî yaran
êsta bê ber û bê ser û saman
řengizerdî werem ser ta be daman
be şinoy xezan wêney nemaman
elerzêtewe aman sed aman
pirsîm: ey hełem, danet bê hełem
boç zerd hełgeřay be derdî werem?
şerab le mîwey to dête berhem
ebê be şifay pejare û elem
tuxwa pêm biłê, çîye em derde?
em peşêwîye û em řenge zerde?
em bêřengîye, bem qewzey serde?
em melûlîye wek azîz merde
witî: lêm geřê, derûn le ẍem keyl
minîş wêney to kewtime sewday leyl
’aşiq bûm be řûy estêrey sîweyl
şořî kewtibuwe diłekey piř meyl
pirşingî cewrî hełîqirçandim
sewday diłdarî cergî sûtandim
dwayî bê meylî xoy pê nwandim
bay bê wefayî hełîwerandim
wesyetî min bê, cwanit xoş newê
kê dîwye wefa lay cwan dest kewê
gîrodet eka be tenha şewê
lepiř wek askî sił lêt eřewê
êsta wek cwanan řołey zemane
kemendit eken be gyane gyane
bo îş pêławit leser çawane
ke îşyan nema derdit girane