agahî siltan amare az tisxîr aqlîm zimîr û şikist lişkirş
From the Book:
Komele Şîrî Feqê Qadirî Hemewend
By:
Faqe ghader hamawand (1830-1890)
2 minutes
804 views
mendey şel û pa şiksitey supa
yawan be ḧuzûr nefis kînexa
maceray eḧwał waqî’ey umûr
’erz bî ne ḧuzûr sułtan meẍrûr
şay saḧêb serîr xiroşa be kîn
kulah şahî da ne řûy zemîn
xak kerd be serda, yeqe pare kerd
pey supay her mułk hem îşare kerd
supay sê îqlîm celay wêş kerd cem
řahî bî çenî supay piř sitem
ce gerd supa û berqey dîr’ wixûd
zemîn ahîn poş, sema bî be dûd
qetar fîlan, zeng barxanan
birîqey sînan, lifey beydaxan
supay hewa û kîbir, cehil ama be coş
’irûq cesed pey dił kerd xiroş
to watî mer sûr ḧeşir û mîzanen
zemîn û zeman gişt ne cumbanen
tey kerd menziłan be te’cîl û tab
be’zê me’mûrey zemîr kerd xerab
ce îqlîm şer’ saza ordûga
ce amaş sułtan zemîr bî aga
tełeb kerd wezîr serdar ḧeqîq
watiş: ha sułtan emmarey zendîq
nefis wêş aman ba supay bêḧed
mezłemeş ne ḧed ḧidûd kerden řed
herdûtan çenî mewcûdey supa
mesdûd ken terîq ew dêw gumřa
her weqit kerdim řast zexîre û supa
min hem ce’eqeb ḧazirim nemca
ew şew şîn ne xew ’alem be yekbar
seḧer horêzan wezîr û serdar
merdan dilêr swar bîn be zîn
řahî bîn ne řa supay sehmigîn
ce zîřey sitûr fîlan û cemel
penhan bîn ne kax sureyya ḧemel
zemîn ce kesret litşikir kêşa a
be gerd dehen sya kerd sema
kêşan direfşan ne řa bîn řahî
serzemîn poşa perdey syahî
dû serdar sext, dû supay piř zor
kêşan řyazet byaban şor
tey bî menazîl řay feqir û faqe
ta bîn ce menził ’îrfan îfaqe
negirtin aram supay yeksere
ta yawan be semit ordûy kefere
ne seḧray wesî’ piř xewf û řeca
şîn ne toy xeymey teslîm û řeza
qerawił berşî ne herdû cîhat
kerdin îstîḧkam nuqtey îḧtyat