astiqbal nimudin wizîr sirdar ra
From the Book:
Komele Şîrî Feqê Qadirî Hemewend
By:
Faqe ghader hamawand (1830-1890)
2 minutes
615 views
wezîr adab muxber bî ne kar
kerdiş îstîqbal serdar xûnxiwar
nezdîk bîn be yek serdar û wezîr
pya bîn ce esp dû saḧêb serîr
pya bîn herdû tekdan be aẍoş
bosan çîhrey yek be coş û xiroş
herdû bîn swar, suḧbet kerdin germ
řewan bîn herdû doş be doş hem
daxił bîn be qesir eywan wezîr
payendaz kirya ce ferş ḧerîr
pya bîn ce esp herdû serfiraz
nîştin neřûy text herdû be diłwaz
buxarî coş werd ne mecmergay ’ûd
řewneq dan we bezim be nefxey sirûd
sade saqîyan tac û kemerzeř
dewr medan çenî badey semawer
ga řewzexanî, mew’îzey îman
ga çerxey qehwe, qehqehey qilyan
ga ekil te’am, ga şurb ḧerîr
ga yad û tîzkar bînay bê nezîr
serdar tełeb kerd derdem muhendîs
wat: cayê perê ordû ker texsîs
abiş carî bo, hewaş piř sefa
ce sebzey wesî’ xeyme ken wepa
muhendîs çenî supa bî řewan
ce toy xyaban supa bî îskan
wepa bî xeyme ne sebzey diłkeş
nîşt ne toy xeyme serdar serkeş
wezîr kamîl be we’dey yek ma
temam kerd espab zexîrey supa
ce dimay dû mah supay dû îqlîm
cem bî, řahî bîn we bê xewf û bîm
zemîn herasan ce sumim feres
sema nîşt ne řeqis ce seday ceres
qetarey fîlan sitûr cemel
yekser ce esbab ordû bî meḧmel
ce bîm supa û debdebey dehûl
ce koh û seḧra nemend bebir û ẍûl
kêşan direfşan zeřbefit zîba
serda ne afaq zemzemey ẍewẍa
be te’cîl tey bî menził be sîr’et
serda ce serḧed mułk şerî’et
xeyme bî wepa ne yek cay wesî’
sebzê, şetawê xoşter ce řebî’