risîdin alxinas be ardiwî iblîs
From the Book:
Komele Şîrî Feqê Qadirî Hemewend
By:
Faqe ghader hamawand (1830-1890)
1 minutes
694 views
kerdiş ḧîkayet ta şîn be ordû
xêza ce ordû hengamey ẍilû
pya bî derdem elxennas ce zîn
sucde kerd ne řûy îblîs le’în
îblîs derleḧze cêş persa xeber
cewab da weneş ce xeyr û ce şeř
dest te’essuf da ne kelley ser
yeqey wêş diřî şûm bed’exter
ce dax firzend wêş mekerdiş dad
çep çep řîş wêş mekend be firyad
derdem be ferman salar supa
ordû kerdin bar, řahî bîn ce řa
coşa cumcumey supay sułtanî
kêşan direfşan syay qetranî
menziłan tey kerd be te’cîl û tab
serda be ḧudûd supay bê ḧîsab
yawan be nezdîk ’ersey řezmiga
emir kerd supa xeyme ken wepa
ne serçeşmey ab supay îblîsî
wepa kerd xeymey nîlî û qeqnesî
supay bêşumar ce xeymey xergah
wêney lekke’ebir zemîn kerd syah
ateş da be top selam ce meẍrîb
xêza ce duşmen zelzeley mehîb
çun yawa be sem’ serdar wezîr
herdûşan be top cewab dan ahîr
nuqtey qerawił berşî ce mabeyn
şîn ce camey xab supay terefeyn