risîdin ’irîzey wizîr biḧzur padşahî û amdad rwane kirdin cihit wizîr
From the Book:
Komele Şîrî Feqê Qadirî Hemewend
By:
Faqe ghader hamawand (1830-1890)
3 minutes
736 views
yawa be sułtan ’erîzey wezîr
wanaşan pey şa ’erzey piř te’sîr
muxber bî sułtan ce ḧał leşker
medhoş temam ne řûy text zeř
dimay yek sa’et ce hoş bî bêdar
tełeb kerd derdem debîr efkar
watiş hey debîr mer çêşen ’îlac
pare bî namûs, textim bî tarac
debîr wat şahim dił mawer be coş
espab dinya ga nêş û ga noş
ye gişt ne gerdiş çerx gerdûnen
asarş ne řeng boqlemûnen
ce qehir û ce lutif nîyen payedar
satê ne sed řeng menmano asar
mer êden ewza’ dinya peristî
ga fetiḧ umûr, gahê şiksitî
biferma cem ker supay bê ḧîsab
řewan ker perê wezîr be şîtab
derdim te’îyn kerd perê her teref
cem bîn serdaran tîp tîp û sef sef
sîlsîley supa çun mûr xiroşa
xeymey dilêran serzemîn poşa
her teref supa axêz kerd çun mûr
serdaran yek yek aman be ḧuzûr
şa kerd aferîn zumrey serdaran
be lefiz te’zîm fermaş ey yaran
elxennas şum awerden supa
supay wezîrş yekser kerd teba
mer ye ẍîreten cengî dilêran!
şeyatîn ce mułk şer’ kero teyran
emmarey kafir îblîs cebrîyen
elxennas şûm temam dehrîyen
qesdiş ne êden le’în bê řam
řewac do be ḧukim sefîney nîzam
herkesê xarîc ayey munezzel
ye’nî be eḧkam qanûn ko ’emel
weytewr ce tefsîr aye mefhûmen
hem kufir hem zułim fîsqiş me’lûmen
eger şehîd ban ce ḧerbey cîhad
ce ’uqba be lutif ḧeq meban diłşad
er kafir be dest herkes bî meqtûl
zenbiş be sewab ḧeq meko qebûl
zumrey serdaran aman be cewab
kerdin senay şa be řesim adab
watşan ême fermanberdarîm
be ferman şa gişt can nîsarîm
be tewfîq ḧeq danay cîhandar
mekerûn karê be supay kuffar
mano dastan ta hezar û hen
her meḧfel be mediḧ sułtan bo řewşen
sułtan be cewab şêran bî řazî
tełeb kerd ne pêş ’îşq mecazî
be wecih xel’et xerqey mirwarî
pêş bexşa çenî řutbey serdarî
hem kûs direfiş, hem xeymey xerga
hem qebiz û hem serf umûr supa
yekser ’eta kerd be ’îşq mecaz
ce beyn eqřan kerdiş serfiraz