dir byan cihat bişrî
From the Book:
Komele Şîrî Feqê Qadirî Hemewend
By:
Faqe ghader hamawand (1830-1890)
3 minutes
704 views
dercen dû cîhat ce her însanê
cenb melekî, cenb ḧeywanî
herkes tekalîf şer’iş kerd qebûl
cenb melekîş meyo be ḧusûl
kerd be îltîzam řay feqir û fena
berî ne emir û umûr dunya
zemîrş ce ’erş mebo wesî’ter
mebo be meqam nezergay dawer
’îşqiş be kursî megêro nîzam
’eqiłş ba elwaḧ sefîney îfham
îdrak be qełem, efkar be řumûz
xutûtiş ce lewḧ eqsamen meḧfûz
řoḧ melekîş herdem teyranen
ew herdem ne wesił melîk ḧeyranen
tebi’ me’îdeş her hefit mebo pak
menmano sefwet hefit perdey eflak
dîdey xeyałş çun şems çarem
firoẍiş ne ’am mebo mucessem
ebir tewazu’ meyo ne barişt
meřêzo řeḧmet ne her zêba û zuşt
be îksîr meyl er kerdiş nezer
her mis be tewecwe ew mebo be zeř
sebir û sukûtiş ce mułk yeqîn
wesî’ter mebo ce mułk zemîn
şorş nimek quwey îxlasen
muḧît ’îlimş ’umman esasen
qyam elîf û řukû’iş dalen
be mîm sucde adem emsalen
herga wey tewren derwêş dił řîş
henî meder dem ne her kem û bîş
cenb melekî çun kerdî beyan
cumle mewcûden cew qutib zeman
ye’nî şêx eḧmed nodîhî leqeb
’alim û ’amîl berzincî neseb
hay derwêş bew feyz talîb ber medam
înşełła bew feyz mebît şadkam
çun kerdî temam cenb însanî
bawer be ewsaf cenb ḧeywanî
hem tebi’ û exlaq hem keramatiş
hem sehim sîfat hem ’elamatiş
her mexlûq ce emir xellaq bî me’af
cenb ḧeywanîş meyo be ewsaf
kîbirş kerkeden, nefsiş camûsen
teme’iş xirs û teb’iş xerûsen
hewaş piłing û buxilş keftaren
zubanş hem şehd hem zehirmaren
lutfiş tûtîy û qendiş qumaren
ḧesediş helû’, fîkirş xumaren
ře’îş kurkîy û ḧîleş řobahen
sayeş ḧecer û hîmmet suflahen
ẍîretiş ne ḧemil guna be’îren
sehimş çun bebir û sewtiş ḧemîren
be zahîr tawus, batînş zaẍen
’eqiłş sîne çak, îdrakiş daẍen
mecaziş ne ’eyn ḧeqîq zebûnen
nutqiş «dikiranArabic» te’imş efsûnen
emelş ahû, şêren ẍezebiş
ce ’emir û zeyden qesd û tełebiş
hem ’eqił û îdrak hem fî’il û quwet
siperden be dest nefis û me’syet
řoḧiş ne zîndan cesed mesdûden
çun mûş ce xaney teng piř dûden
be ’îzzetî wêt ḧeyyî řebbanî!
xarîc ker ney ’ebid nefis ḧeywanî
emmarem meqyûd, řoḧim azad ker
qapîy îdrakim herdem guşad ker
bider tewfîqim, ’ezîm û tewwab!
’eta ker cuhdim ce kar sewab
derwêş qelbim be seyl îḧsan
tewangerş ker be nûr îman
be eltaf wêt ḧeyyî layenam!
’efûm ker ce zenb guzeştey eyyam
hem be feził wêt ey ’ebid zelîl
yaḧeq! şadim ker be tewbey te’cîl