řoyştinî meymûne xatûn legeł hendê le perîyan bo lay feyazî ’abêd
From the Book:
Suɫtan Îbrahîm û Noşaferîn
By:
Khana Qubadi (1704-1778)
40 minutes
563 views
nîşt neřûy hewa wêney bad berd
ta teşrîf welay feyaz ’abêd berd
kefit ne xak pay ’abêd dana
’abêd piř feyz ’eleyk sitana
xatûne be zar nîşt neřûy zemîn
daman ’abêd girt merêzna esrîn
’abêd wat xatûn pey çî mekey şîn
pey çî ne gonat meřêznî esrîn
xatûn wat ’abêd şazadey salar
be nêş maran azarş bîyen ji ar
keften neřûy xak çun merdey mezar
zebanş lengen neřaz û guftar
’abêd wat xatûn aga ber nekar
duxter «’elqem» «zerîr» murdar
ew ce koh qaf amabê be war
ew ama pey hûn «’elqem» murdar
be efsûn sext ḧîle kerd nekar
firsetiş awerd zerîr murdar
axir herdûşan xwab bend kerden
her dû bê hoşen tabe řûy merden
ne telîsim sext wêş penhan kerdin
pena be emîr koh qaf berden
telîsim «zołmat» ḧezret suleyman
zerîr ne ewca wêş kerden penhan
taçerx gerdûn menden nerûy ser
’elaciş nîyen bebiř piř huner
meymûne xatûn şineft ey xeber
dest kerd be zarî çun řoj meḧşer
bedîdey esrîn megrewa be zar
watiş amanen ’abêd salar
’abêd êd şineft kêşa ah serd
şî be zîr xerqe sucdey zemîn berd
feyaz ’abêd ama be guftar
watiş ey ferzend xatûney nazdar
berd lewḧ zeř ber’awerd we ber
wat ey lewḧ bider bedest pider
bwaçe peneş xan wefadar
ew mebo bilo pey telîsim tar
seyr bikero lêş cem’ muşkêłat
karan dişwar asan bo ji lat
swar bo we esp wêney şêr neř
bikero fetiḧ telîsmat we şeř
kax suleyman zułmatî mawa
mebo xan miḧemed bikero de’wa
ew telîsim sext be namş nwîsyan
zerîr cadû bedestiş kuşyan
biẍeyr xan miḧemed ’ałem be yek bar
kes nekero çar zerîr murdar
xatûn dest ’abêd derdem bosawe
watin be perîyan bişîm we řawe
ew nesum’ey feyaz ’abêd
hîmet sitana ji pîr zahêd
we şewq û şadî yawa perê çîn
lwa we xidmet şahan xemgîn
serguzeştey ḧał feyaz ’abêd
wana perêşan we qewł zahêd
êd şineft we goş wezîr û serheng
poşa we endam espab řoy ceng
hat webarega ser firûd awerd
bosa zîr pay şêr řoy neberd
we dîdey esrîn bena kerd we şîn
bosa kef pay sułtan maçîn
’erz kerd horêze şêr řoy mesaf
we tenha meçûm pey telîsim qaf
hoşyar ber wenem dilêr maçîn
gîr nebûn wedest dêwan le’în
şayed new telîsim bestey caduwan
min gîr bam wedest ew sêḧir dêwan
umêdim be kên xakim bo we ser
dinyam webê to bîyen wemeḧşer
xeylê zarî kerd pey sułtan çîn
pena berd wezat cehan aferîn
hîmet sitana ji pûr ’adił
bosa dest û paş wezîr ’aqił
swar bî we pişt ferheng namdar
meymûne xatûn, řux beqadar
we hemřahîy ew şêr řoy mesaf
we te’cîl û cext lwan pey koy qaf
jiqel’ey eweł nekerdin aram
jiduwem řed bîn şêr saḧêb sam
yawan weswem nîştin wezemîn
gişt sucde kerdin řebul’alemîn
ferheng mûy wêş řux beqadar
muwêy meymûne ew şox nazdar
daşan be wezîr xan miḧemed serheng
beřûy agir weqit řoz teng
weqtê şikestî telîsim zułmat
agir der derdem ḧazir bîm ji lat
êmeyş ji paydar goşe û kenarîm
perê weqit teng lêt xeberdarîm
xan miḧemed pena berd wexudawend
řû kerd we telîsim webê çun û çend
zeban piř je zîkir danay kirdigar
daxił bî we toy derwazey ḧesar
çeşmey abê çun çeşmey zem zem
luxt û ’uryan bî ẍusiłş kerd derdem
wizû taze kerd dû řek’et nimaz
awerdiş weca pey emir nyaz
be’daz şukiraney danay lem yezel
dest berd ber’awerd lewḧiş nebeẍel
dîş ne řûy lewḧda wey tewr nwîsyan
muḧît telîsim nebîy suleyman
bayed we hîç tewr xof narî wedił
eger xof kerî kar mebo muşkił
binîşît neřûy derwazey ḧesar
şêrê sifîdê wêney řawyar
neteref řast telîsim bo peyda
ha negerdenş yek tewq teła
herweqit daxił bîn nederwaze şêr
bayed ji puştiş swar bî çun tîr
şêr meçot netoy telîsim be dewan
bayed nekeyt xof ji ew neře dêwan
herçend ke zengî û cadû ejdere
mewînot we çem şêr piř hunere
«teḧemuł biker hîç mew we zuban
ta her weqit ke şêr ama we zuban»
xan miḧemed bosa lewḧ zeřnîgar
we taw û te’cîl nîşt ne toy ḧesar
şukir kerd wezat danay kirdigar
şêr ama we toy derwazey ḧesar
xan miḧemed çun tîr nîşt wepişt şêr
awerdiş wedest tełay tewq şêr
şêr çî we telîsim daxił bî newca
seday ’ecayb ẍûlan neher la
şerarey agir nedemaẍ û goş
mama we bîrûn coş mawerd wecoş
perê řay řewend xan miḧemed aman
watin ey wezîr nadrey zeman
pyade ber neşêr herca meylten
serumał û gyan we tufeylten
wezîr we’ewan nekerd îltêfat
dest weḧełqey şêr merdaney mîrzat
ta ji toy telîsim lwa we bîrûn
dyaş byawan bîřay .........Missing
qesir û ’emaret telîsim hîşt weca
ta şêr çî we ser yek ’emîq ça
şêr lwa weça webê çenduçûn
wezîr pena berd wedegay bê çûn
ẍerq bî ne ateş deryay bê saman
wat pena we to karsaz karan
şêr neteh ça nîşt weřûy zemîn
neqbê dî neça wezîr maçîn
nîga kerd neça syay taruteng
jew zîr zemîn piř bebir û piłeng
şêr we toy neqib řahî bî we řa
aman pey wezîr bebir û ejdeha
qedir çend hezar hełqe dan muḧkem
xan miḧemed dya çem nya we hem
hîç «pape» newî we ḧerf ewan
dû řoj û dû şeb řahî bî řewan
muḧkem girtebêş wêş nepişt şêr
yawan we bîrûn ejdehay dilêr
şêr ne zîr zemîn ama weseḧra
tabeweqit zuhir tey bikerdiş řa
baẍêk dî be çem yel pehlewan
şêr lwa we baẍ ama we zeban
tekan wêş da şêr bê nezîr
wat we puşt min pyade ber wezîr
pyade bî neşêr wezîr ’adił
medhoş bî nehoş xełtan bî wegił
be’d ji sa’etê amawe behoş
şukiraney dergay setar siřpoş
horêza we pa çî wedlê baẍ
qedrê mîweş werd çax bikerd demaẍ
hoş amaş we ser şêr bê endêş
lewḧ awerd we ber nîga kerd we pêş
dîş nwîsyan ji lewḧ ḧerîr
wenet me’lûm bo bizane wezîr
semit dest řast baẍ bigêr newer
take byawî weyek qesir zeř
«qiłfen» der qesir wetełay eḧmer
meyot we bîrûn şerarey şerer
bełê hemîn lewḧ biderît weder
waz mebo bestey «qiłf» tełay zeř
meters ji ateş biço we toy qesir
mewînî we çem çend şox dułber
gişt ře’na qamet gişt kemend řaz
meyon perê to we’îşwe û we naz
cem’ meḧbûban bała newnemam
weḧerbey bê řeḧim biker qetił û ’am
temam caduwan ey şêr namdar
we toy qesir zeř murẍêk ha wedar
řengiş qirimzen ha netoy qefes
we şu’ley ateş bisozan qefes
herçend ew murẍe îltêmas mekey
zînhar sed zînhar murẍ řeha nekey
emanet řołe murẍ narît weder
her we toy qefes agirş bider
mawer we bîrûn qesir zeřnîgar
perêş cem biker hêzim be xerwar
her be ew qefes murẍ we agir ner
murẍ ke sozya ahû bon ḧazir
qefes ke sozya murẍ bot we ahû
biço we şonş mewnîwit cadû
cezîrey cadû mewînot we çem
pare pareş ker wemewday sitem
bełê hoşt bo wezîr serheng
şêrê mewînî hem kor û hem leng
ha nepayey text emîr koy qaf
hem kor û çulax ey merd mesaf
şîşeyê ke xwab bend sułtan çîne
telîsmen ji dił şêr piř kîne
wezerb şimşêr şêr ker seringûn
şîşe netoy cerg ew bar we bîrûn
eger ew şîşe nawerî wedest
gîrî we telîsim ta ḧeyatit hest
nimebon ’elac şazadey maçîn
hoşyar ber wekar çun şazadey çîn
eger ke emîr umeray koy qaf
aman çenî to bikero mesaf
ewîş hem wetîẍ buřindey buřan
qetłu’am biker ey şêr ẍuřan
eger ke eman lêt kerden tełeb
eman pêş bider wêney şay ḧełeb
xan miḧemed lewḧiş nya we dîde
watiş bîsmîlla ew berguzîde
sełwat deyn wedîn pak pêẍember
wêney feramerz pa nya newer
jiteref řast baẍ bê nezîr
lwa we řawe wêney neře şêr
ziban piř ji zîkir yektay xudawend
yawa we qapîy şîr ercumend
dîş ke yek qufłê ji tełay eḧmer
kilîden û çifit řîzey puşt der
wana mediḧ zat xuday kes nedîd
lewḧiş we te’cîl da neřûy kilîd
«qiłf» kefit wezemîn qapî bî guşad
çî we dilê qesir yezdan kerd weyad
çendîn meḧbûban bała çun bilûr
aman newendiş gişt bewêney hûr
gişt be ’îşwe û naz yawan be wezîr
mat û ḧeyran mend wezîr delîr
murẍ ’eşq ew derdem kerd perwaz
amaş we xatir feyaz weş řaz
kêşa ji «qelaf» buřendey abdar
temam meḧbûban bikerdiş qelar
goşey qesir dî murẍ bał zeřîn
nedlê qefes qirimz û şîrîn
dest berd bew qefes awerdiş be war
ama we zeban murẍ zeřnîgar
wat we xan miḧemed zînhar sed zînhar
min biker xelas şêr namdar
îltîcam êden wezîr we îxlas
řeḧim biker wenem min biker xelas
sewgendit we merg sułtan maçîn
merexesim ker ey şêr guzîn
xan miḧemed derdem wekeyf demaẍ
qefes û murẍ berd lwa çî webaẍ
řewşen kerd ateş webê çenduçûn
zebaney ateş meçya wegerdûn
şu’le da neber seḧraw keş û kû
nyaş we ateş ew murẍ cadû
wist we toy ateş murẍ zeřîn bał
qefes bî wegerd berdey bay şemał
murẍ bî we ahû řû kerd weseḧra
lwa we şonş dilêr dana
řagey byaban bêdî girt newer
gum bî nedîdey wezîr serwer
wezîr dî ahû gum bî ne seḧra
cadûy dya wêney bezim ara
kêtab mekirş girtebê be dest
efsûn mewana peyapey weqest
seyrkerd we’efsûn ewcadûy piřhoş
agir ji bînîş hem ji dîde û goş
meyot we bîrûn poşa deştuder
jiḧełqiş meyon çend řeng canewer
ji şêr û ji bebir ejdeha û pileng
piřbî řûy meydan pey me’rekey ceng
jew teref dya emîr koy qaf
nîşten weřûy text çûb ’ûd saf
baqîy begleran koh qaf temam
heryek nekursîy zeř girten meqam
şêrê dî we çem ji pehlûy emîr
hem kor û hem leng îflîc û zewîr
betewr ’ezîzen şêr leng û kor
ser nyan we zanûy emîr piř zor
sedayê ’ecayeb mama we goşiş
xan miḧemed ji ew dem hîç nemend hoşiş
çendîn ẍerayb dî we çem wezîr
awerd we bîrûn lewḧ bê nezîr
dîş nelewḧ nwîsan meker wahîme
endîşet nebo ne’ey hemheme
wezerb şimşêr karê kerpêşan
zînde berneço yek ten celêşan
herçî hat weřêt ji dêwu ji cin
řîşeşan temam ber’awer ji bin
endîşe meker ji cadûy bê pîr
pare ker temam wemewday şimşîr
lewḧ derdem bosa nyaş webeẍeł
wat penam beto danay lem yezeł
watiş bîsmîlla řeḧman û řeḧîm
wefeził û umîd karsaz kerîm
pey fetiḧ telîsim «ana fitḧina»
mewend we te’cîl dilêr dana
zîkir zebanş ayey qur’an bî
dił piř ce weswas saḧêbqiran bî
kêşa ji xelaf xûnrêz şimşîr
dûpare mekerd ji piłing û şîr
her canewerî ama perê ew
dû ḧêseş mekerd ce piřtaf dew
ji dêw ji bebir ji şêr dû dam
mekerd dû ḧêse wemewday semsam
ewen qetiłş kerd wezîr dilêr
ta wêş yawna wecadûy «cezîr»
kêşa ne’retey ełahu ekber
dest wetêẍ tîz berd we ban ser
da ji ferq ser ew cadûy cezîr
ta wekemerga xişt bî çûn penîr
sełwatê wana wezîr piř zûr
telîsim sya bî çun şeb deycûr
gerd û sa’êqe bułend bî ne erz
menîşt wesema semawat berz
dinya ji dîdeş bî we asyab
her weqit bî meẍziş saf bibo we’ab
wana sełwatê hem îsim e’zem
pena berd wezat danay mu’ezem
be’d az yek sa’et sa’êqey azer
temam betał bî we emir dawer
dêwan û perî hem emîr qaf
dyaşan wezîr şimşêr bê gezaf
nîga mekerdin bezor bazû
cezîr cadû kerdiş řenceřû
tac zeřnîgar berdaşt ji ser
watin elaman ey şêr serwer
to wexuday wêt ji ême biguzer
bewkes wetodan ey zor û huner
xan miḧemed eman da we’emîran
řû kerd weşêr kuşendey şîran
we mewday ełmas wistiş wezemîn
xencer ji kemer horkêşa we kîn
şikem ewşêr derdem pare kerd
şîşey kezayî ji dił ber’awerd
nya we beẍeł wezîr ’adił
xeylê xoşḧał bî şikofa çun guł
şukir kerd wezat dehendey dawer
sełwat da wedîn pak pêẍember
horêza ji text emîr kebîr
bosa dest û pay xan miḧemed wezîr
wat fetiḧ telîsim mubarekit bo
telîsim şikestî wenet me’lûm bo
xan miḧemed nîgay cagey telîsim kerd
çend ademîzad wenezer awerd
asar ji telîsim nemenden we pa
celdê xêzya dilêr dana
temam adem ji ben řeha kerd
bosan dest û pay şêr şêrmerd
xelas bîn lwan pey me’way wêşan
heryek şad bîn we ’eyał wêşan
çend xerwar gewher kokiryan weko
berzîy her koyê bołenditer ji ko
řeng řenk cewahêr cem bîyen bewca
agir efroza ew şêr şuca
mûy ferheng û řux «purî» we’agir
sozya we te’cîl hersê bîn ḧazir
meymûne xatûn wana aferîn
watiş merḧeba ey şêr guzîn
karê to kerdî şêr bê mîsał
hergîz nekerden ne řostem ne zał
merḧeba wezîr sedcar aferîn
necat dehendey şazadey maçîn
bwaçe perêm çi kar kerdenî
çitewr wey telîsim firset berdenî
wezîr we’adab yek yek ji xizmet
watiş weḧuzûr ewperî tel’et
dûbare weneş bikerd aferîn
wenet ḧerał bo řenc şar çîn
weřûy muḧîbet şox gerden zerd
we emîrqaf xeylê te’aruf kerd
wana şerḧ ḧał şazadey maçîn
yek yek wexzimet emîr guzîn
emîr ḧałî bî meymûne xatûn
zewcey şazaden wey tewre meḧzûn
horêza we pa weneş kerd selam
’erz kerd bibexşe teqsîr û gunam
çî wexezaney nebîy suleyman
qałîçe û ’esa û kułay suẍrîcan
awerd da wedest wezîr piř zûr
wezîr bosawe ew tuxmey piř nûr
nyaş weřûy çem wezîr ’adił
sełwat da wetac ḧel nimay muşkił
sed hezar gewher dane û cewahêr
da we perîzad çun seng bahêr
cewahêr xas tuḧfey gûnawgûn
nyaş we xidmet meymûne xatûn
xeylê merḧeba kerdiş we’emîr
watiş weferheng hordare çun şîr
horêzan we cext we te’cîl û tar
emîr û sipaş çwarde hezar
nîştin wegerdûn wêney ebir tar
meçyan perê çîn wezîr namdar
yawan wemeḧał mekan demişq
meymûne û wezîr şeyday şûr ’eşq
ta çîn we xidmet ’abêd ’aqił
xan miḧemed çenî «hewł» sifîd guł
te’zîm dan sucde û selamş kerdin
qa’îdey edeb weca awerdin
xan miḧemed şîşe nyaş wezemîn
nyaş we xidmet ’abêd guzîn
aferîn wana feyaz bew wezîr
watiş sed eḧsen şêr bê nezîr
ḧała ey şîşe biber perê çîn
binyer we sîney şazadey maçîn
ey lewḧe bider weřûy şîşey seng
mexêzot we pa dilêr řoy ceng
xan miḧemed çenî meymûne xatûn
dest û pay ’abêd bosan bew mezmûn
hîmet sitanan aman we bîrûn
yawan we’emîr webê çenduçûn
xwaḧafîzî kerd ji emîr qaf
lwan perê çerx bê sitûn tenaf
take şar çîn dyar da we çem
aman we zemîn we endek kem kem
sełwat deyn we dîn şay řef řef swar
selam webaqîy e’îmey ethar
biçîm we ser wext bêçare ’adił
hewro pey ferzend wêş menya wegił
dewar kerd we berg ji daẍ ferzend
mûy sûret daym wenaxûn mekend
şay ’ebduřeḧman çenî ’adił şa
teyar kerdişan qesir û barega
tertîbdan perêş ḧecley zeřnîgar
nyan we ḧecley ew herdû nazar
çend hezar çiraẍ kerdişan řewşen
neçwar etraf şêr encumen
kerdin we’ateş çend ’ûd û ’enber
megrewan perê şazadey serwer
şewan we zarî řojan we çemer
çemeřay amay wezîr serwer
yek mah û no řoj kerdin zarî û şîn
we çilemîn wezîr nîşt wezemîn
te’zîm da wetac ciqey şah çîn
wêş wist weřûy ne’iş dilêr maçîn
bosa dest û pay şazadey serwer
xeylê zarî kerd xak řêza we ser
şîşey kezayî ber’awerd we ber
nya we sîney şazadey serwer
lewḧ da weşîşe şikya şikest werd
sułtan îbrahîm xêza ’etse kerd
xurşîd we te’cîl horêza we pa
wêş poşa we berg xulasey ała
sułtan maçîn nîgay çwardewr kerd
temamîy şahan wenezer awerd
çî ji xaney fîkir şah saḧêbqêran
perê çêş poşan lîbas qetran
watiş ey yaran nimez yeçêşen
jey berg sya dił we’endêşen
yaran yanê çêş bwaçin perêm
ye çi xeberen ḧałî ken wepêm
şahan yekayek bosan dû dîdeş
bo nyan webo no berguzîdeş
watin çil řojen cezîr cadû
xawbendit kerden wenet me’lûm bo
we guftey feyaz xan miḧemed wezîr
çîn wekoh qaf kuşten ew cezîr
telîsim zułmat nebîy suleyman
şikesten wezîr ’aqił piřdan
şîşey telîsim bend awerden pey to
xawbendet řefi’ bî we şad û şiko
şazade xeylê te’ecub mekerd
maman wexzimet fewc fewc zen û merd
zyaret kerdin dilêr namdar
bî we zemzeme wêney eweł car
berg syahî hewadan newer
poşan nebeden lîbas exzer
çiraxan kirya temam şar çîn
şadî dûbare ce ew serzemîn
sułtan îbrahîm lwa be ḧemam
cela da cemîn bałay newnemam
ama we bîrûn lwa weḧerem
çenî ew xurşîd we şadî û xuřem
ew şew çenî hem kerdin destibazî
dû talêb we hem we diłnewazî
sub ke şazade çî webarega
lwa weřûy text qerar girt weca
ewçenî şahan tewazu’ mekerd
xisûs xan miḧemed yel şêrmerd
watiş merḧeba hezar aferîn
řût sifîd bo hem ji dinya û dîn
naga dyaşan řûy xurşîd tar bî
zułmat engîz bî leyl û nehar bî
sipay perî û dêw weřûy hewawe
çun mûr û melex maman we řawe
çenay çend hezar aman wezemîn
text zeřnîgar daxił bî we çîn
selatîn temam seyr kerdin we text
ji toy text ama yek zeřîne řext
cewanê wêney qehreman qîn
yam carê řustem nezabul zemîn
weşkił û řeftar wêney aftab
yake çun peşeng yan efrasyab
ama wexzimet şazadey maçîn
dest girt we sîne bosa serzemîn
welefiz şîrîn şay wala meqam
watiş sed ’eleyk cewabî selam
ji řûy text zeř nîşan da pêş ca
xan miḧemed dya horêza we pa
sucde berd we pay qedemgay cewan
řû kerd we xidmet şay saḧêbqêran
’erz kerd êd emîr umeray qafen
bê perwa neroy ḧerbey mesafen
şazade û şahan horêzan we pa
te’zîm da weneş bosa dest û pa
bêx bałş girt sułtan namdar
awerdiş we ban text zeřnîgar
cageş neřûy text zeř dadin qerar
payendaz kerdin gewher be xerwar
tewazu’ pêş kerd şêr bê gezaf
meclîs zînet da pey emîr qaf
’eyş berpa kerd çun ’eyş fereng
benezim xurşîd şeyday şox şeng
serxoş bîn ji mey şahan zeřbext
emîr koy qaf horêza we cext
wat saḧêbqêran goş der we’erzim
’erzim wacêben wacêben ’erzim
perê metłebê min darom umîd
er qibûł kerî wetom hen umîd
sułtan maçîn watiş biferma
hermetłebê hen ji lam bo řewa
watiş bizane şazadey maçîn
emîr qafim bende kemterîn
yek ’emû darom şay saḧêbqêran
îsim şerîfiş wecehan aran
duxterê nepes perdey ’emûm hen
nîyen be wêneş herçê meḧbûb hen
namş nûr’el’eyn şay şekerrazen
bałaş be wêney şimşad dirazen
’emûm nûrli’eyn perêm kerd namzed
qibûłim nekerd ji îqbał bed
çunke nûrli’eyn nedîm xatir cem
nesozam perêş çun perwane û şem
řojê ne derûn ey bendey kemter
bezim meclîs bî û ziřey zeng zeř
mest laye’qêl herkes pey wêşan
mekerdin şadî be keyf wêşan
nûrli’eyn ji ew dem min webê nîqab
dyam sûretiş wêney aftab
řîşey cerg min pêkaş wexedeng
mat bîm ḧeyran bîm serd bîm wêney seng
ne aram ne sebir netaqet daştim
nexurd nexurak neşew xaw daştim
dûsał wey destûr şewan ta wero
bade quş asa mewatim koko
ḧeya mekerdim min ji lay ’emu
xwastigarî kem ewnemam no
axir yek şewê bê tabî kerdim
dîm hîç tewr nîyen ’îlac derdim
ẍulamê daştim çun mêhter nesîm
’eyar piř fen guzîdey qedîm
namş xełxał bê wêney bay şemał
tey mekerd yek sat ew řagey yeksał
watim we xełxał mezanî çûnen
dił pey nûrli’eyn lebřêz hûnen
karê bikere nezanot ’emo
biço bawere ew nemam no
horêza we cext piřtaf da wedew
lwa bawero ew nemam new
xanay qubadî «27»
qedrê lêş guzeşt nama wedma
nişanê nama ji ew ḧorî leqa
dîm seday şîwen ji ew yaney ’emo
mekerdin feryad waweyla û řo řo
mewatin xełxał ’eyar piřqîn
webê çenduçûn berdiş nûrli’eyn
xeylê xoşḧał bîm lwam wedma
we şadî perê ew ḧorî lêqa
çem întîzar bîm ta we sub seḧer
xełxał namawe pêm neda xeber
řo bî horêzan çîm webarega
temam emîran heryek caberca
ji text zeřkar qerar girtişan
şay cehan ferma ama perêşan
çun yawa wenezd bendey kemterîn
watiş ey emîr we dîdey girîn
îmşeb ẍułamit xełxał ’eyar
nûrli’eyn berden ji qesir zeřkar
we pay berehne amam we bîrûn
watim to kênî napak mel’ûn
watiş xełxałim ey mah taban
mewerim we telîsim şah suleyman
êsta nûrli’eyn min metwam ji to
megrewa zar zar waweyla û řoro
qedrê diłdarî kerdim we’emû
horêzam we pa şêr başkû
berdaştim sipay hezar neře dîw
lwam bew telîsim be ẍewẍa û ẍerîw
tayawam bewca ew çwar quley qaf
řûbeřûy telîsim şah bê gezaf
nîştim wezemîn weřûy qîn û qar
nwîsam kaẍez pey dêw murdar
padşay telîsim ey şah ekwan
mefhûm bo wenet şay neře dêwan
nûrli’eyn duxter şay cehan ferman
namzed minen ew mah taban
xełxał mel’ûn xidmetkar min
awerden wey ca penahendey tun
ełbete xełxał webał beste
min ji to metwam wexwaru xeste
name dam qasêd berd welay ekwan
telîsim zeřîn şah suleyman
kaẍez wende bê ekwan puř zûr
webał beste xełxał wezerûr
kerdebê wetewq ahen û zencîr
çenî nûrli’eyn dêw bê nezîr
awerd pey bende we ’uzirxiwahî
wecem’ dêwan san sipahî
min herjew mekan xełxał ’eyar
we mewday ełmas kerdim pare par
xeylê newaziş kerdim we ekwan
xel’et dam temam dêwan ekwan
horgêłam we cext amam wedma
yawam be xidmet şay cehan ferma
’eqid best perê min şewq xor lêqa
bende ’erûsî kerdim ne ewca
bî we zemzeme û bał bazî û baz
seday zîł û bem saz diłnewaz
weqit ’erûsî cezîr cadû
ama bew telîsim şah başkû
’erûsî temam mewqûf kerdim min
çîm welay cadû mekar piř fen
yek mah kamił min ji ew telîsim bîm
ta ke xan miḧemed yawa bew êqlîm
watin xan miḧemed aman pey cadû
seyr kerdim kêtab şêr başkû
dîm telîsim şiken xan miḧemed şêren
kuşendey qatił cadûy cezîren
xan miḧemed bikuşt cadû we şimşêr
telîsim şikawa şêran şêrgîr
meymûne xatûn duxt şay perî
te’rîf to kerd ḧûr enwerî
min şewq lêqay to daştim we ser
amam we xidmet sułtan kêşwer
îse îltîca û umêdim êden
umêdê darom wetom umêden
teşrîf bifermay wecem’ şahan
biçîm we telîsim nebîy suleyman
bendexaney wêt bikerî řewşen
çenî ’adił şa şahan temamen
nequley sîmî bendey koy qaf
pey ’erûsîy min şêr řoy mesaf
çend řojê newca qedem řenceker
bena wexatir ey bendey kemter
sułtan maçîn watiş we dîde
min îxlas mendim ey berguzîde
welefiz şîrîn qibûł kerd weneş
ferman awerdin çend text zeřkeş
nîştin we řûy text temam şahan gişt
’adił şay çînî û ferzend zor mişt
şay perî û xurşîd, şah cehangîr
elyas û tûfan ḧemîdî û wezîr
se’îd û mes’ûd padşay ḧeleb
şah qemerye eskender leqeb
gewher tac we ser şay noş aferîn
meymûne xatûn şewq xor cemîn
xurşîd ’ałemgîr şewq beyzay řoz
mah zeř’efşan çenî cehansoz
temam awerdin padşay maçîn
kul nîştin we text çun mah perwîn
temamîy şahan nîştin weřûy text
hewa daştin dêw we te’cîl û cext
dêwan mekêşan şêran mesaf
wetaw te’cîl perê koh qaf
murẍ řux çenî ferzendan wêş
nya bên ne text şah bê endêş
perwaz mekerdin şeqedan webał
we şewq û şadî wekeyf û xoşḧał
dû řo wey destûr meçyan we řawe
wekeyf û diłxiwa we řûy hewawe
řozî sêyemîn yawan wecayê
yek cezîre dîn cay basefayê
guł řeyaḧeyn narinc û lîmo
çeşme û mîrẍuzar xoş ab û diłxo
sułtan îbrahîm persa ji ferheng
îne kam mawan ey dêw serheng
’erz kerd cezîrey şay kalîkate
mekan zengî piř keramate
maway zengîyan wey tewr dyaren
temam herçê hen kul ademxiwaren
řux çun îsim kalîkat şineft
agir çî weneş çun biłêsey neft
kêşa yek ahê řux beqadar
’erz kerd we xidmet şah cehandar
teseduqit bam ye ew mekanen
bałim şikesten cay zengîyanen
to hem mu’eteł bît, ḧemîd û wezîr
şikanin lûlaq bał ey ḧeqîr
to yaway wedad bendey şermesar
bendet necat da ey şêr namdar
şazade zanaye ye ew mekane
wezîr benayê kerd webehane
behaney benay ferîb da pêşan
ji dest zengî hor kerdin wêşan
ji ey cezîre murẍ řûy sifîd
her çwarşan berd xwa kerd umîd
perwaziş mekerd ew ji řûy besît
ta wêş yawna we deryay muḧît
wat xan miḧemed şay ’alî mêqdar
bayed zengyan bikerîm qelar
zengî qelar keym wemewday ełmas
yekten nemano ji ey qewm neşnas
wedawer kerûm xidmet we’îxlas
ta misułmanan lêşan bon xelas
xan miḧemed çenî ḧemîd mela
damen dan we qed astîn webała
kerdin ḧemayel şimşêr wegerden
çenî şazade řû we řa berdin
watiş we yaran şazade maçîn
êwe sakên bûn medarin temkîn
wêm çenî ḧemîd wezîr wetenya
meçûn wede’way zengîy řûsya
wextê ke ne’rey ełahu’ekber
şineft we goş yaran yawer
wêtan perê seyr dêwan perê ceng
beyun we te’cîl ceng syazeng
êd watin lwan şêran ji yan
řûkerdin wemekan şah zengîyan
yawan wenezdîk şah kalîkat
dîn dinya taren bewêney zułmat
kalîkat ji ko girtebê qerar
nedewirş cem bê zengî sed hezar
zengîy ademxiwar padşay zengî
weqtê şinasan şêran cengî
watiş benahan tîrey řozgar
êwe çîn perêm bisazin telar
îne hefit sałen bełke zyadenan
esłen ji êwe kes nawerd nîşan
herçend ke temam zengîy syatar
megêłan nedîn ne qesir û telar
wêtan ji ko bîn îste amanîn
bwaçun perêm hem xoş amanîn
şazadey watiş zengîy ademxiwar
teyar kerdenîm hem qesru telar
* ta ḧeram nekeyt xurden adem
ew ’emarete nimeyot we çem
henî terk biker zengîy ademxiwar
ta nîşanit deym ew qesir û telar
kalîkat şineft xiroşa weqîn
ewxo bê dîn bî bedter çî ji dîn
sya bî çun qîr bedter weşeb
watiş ey benay herzey bê edeb
xeyałit êden wêney eweł car
min ferîb biden ademîy bê ’ar
bwaçim wepêt ustad neqaş
îmşeb ser to bayed kem we’aş
baqî pey mezey şerab gułnar
biken wekebab zengîy ademxiwar
hey kerd we yaran zerbey sya řeng
bigêran perêm şêran bê direng
zengîyan dewran dilêran girtin
heryek ji layê hicûm awerdin
sułtan maçîn dest da weşmişêr
pêka we zanûy dû zengîy dilêr
derdem herdûşan qełem kerd wetêẍ
ji kuştey zengî nekerdin dirêẍ
dest da wedestey gurz nosed men
nîşt we zengîyan wêney tehmiten
ḧemîd û wezîr wetêẍ semsam
ji sipay zengî kerdin qetłu’am
şazade kêşa ełahu’ekber
ama ne lerze zemîn seranser
şay ’ebduřeḧman çenî cehangîr
’adił şa xurşîd, emîr kebîr
şineftin seday ełahu’ekber
watin we dêwan temamî yekser
biçîn we îmdad dilêr maçîn
qetił û qiř kerîn zengîyan le’în
dêwan wey te’cîl yawan we zengî
welay şazade sermest cengî
watiş we dêwan şazade namdar
nimazûn berçon yek zengîy murdar
karê bikerîn wedar şimşad
’umir zengîyan biderîn we bad
dêwan şineftin ji şazadey çîn
dest dan wedestey şimşad sengîn
nîştin we zengî dêwan naxar
bena kerdişan weqetił û kuştar
bî wehey bigîr taw pêkan we hem
dêwan û zengî çun zaẍ û zeẍem
kalîkat ẍuřa wat we zengîyan
yeksan hicûm den wespay dêwan
dêwan qîqe dan çun ře’d behar
medan wekapoł zengîy ademxiwar
şazadey maçîn dest wetêẍ tîz
wist we zengîyan şûr řestaxîz
weherkes meda dilêr namdar
dû pare mekerd be wêney xyar
ḧemîd û wezîr ji dax derûn
sedaşan meçya we gêj gerdûn
weḧerbey bê řeḧim ełmas abdar
kerdin qetił û ’am zengîy ademxiwar
jew seday ẍuřş ferheng serheng
menîşt neřûy taq çerx mîna řeng
zîřey zengîyan birîqey şimşîr
nirkey şazade ne’retey wezîr
ne’rey neře dêw teqey dar şimşad
hey bizen bizen zengîy bed nêjad
ẍerez çêş waçûn şazadey çînî
zengî temam kerd weḧerbey piřqînî
řîşey zengîyan ewro da we bad
çun řezim geřa şîrîn û ferhad
kalîkat dya zengîy bî qelar
ji ters gyanş řû kerd wefêrar
ferheng dya dîş şay ademxiwar
dest da weşmişad sext nahemwar
piřtaf bad ferheng piř qîn
wêş řesan we şah kalîkat zemîn
pêka we keleş şimşad sengîn
wesił meydan kerd weḧerbey piřqîn
gyanş wemalîk dozex telîsim kerd
řoḧ pelîdiş we ceḧîm siperd
’eyal û etfal zengîy ademxiwar
qetił û qiř kerdin dêwan murdar
zen û xurd û tufił, řêz û hem heraş
wezerb şimşad gişt kerdin peraş
řîşey zengîyan dan wedem tîẍ
we zerb şimşad hor kenden ji bîx
şazadey maçîn ferma we dêwan
perêm baweran geley ferawan
ji gaw gûsfend ji buz û ji mîş
çenî madegaw hem çenî gawmîş
biçîn bawerîn řeha keyn neyca
perê zexîrey řux ba wefa
çend hezar dêwan heryek nelayê
heryek řûkerdin weyek me’wayê
herçend ten řû kerd weyek meḧałê
awerd ḧeywan guşt ḧerałê
ferma řeha dan we çeşme saran
perê zeḧmetan řux û ferzendan
watiş erî řux wefaw beynetdar
menził ker netoy çeşme û murẍizar
ey gaw û gûsfend min bexşam weto
perê xerc şam ferzendan to
xeylê çenî min kêşanî zeḧmet
êd berat to hem êden xel’et
řux bosa řûy xak sułtan serîr
do’a û sena wat we şay cehangîr
herta ke zîndey řûy serbîsatim
’ebid duřnegoş ḧazir ji latim
newca menził kerd řux bê nezîr
çenî ferzendan řux ba tedbîr
şazadey çînî dêwan mesaf
aman wedîdar emîr koy qaf
şerḧ guzarş zengîy ademxiwar
’erz kerd we xidmet emîr salar
emîr aferîn kerd we şah çîn
watiş biferma nûr dîde û dîn
gişt nîştin we text temamîy şahan
perê ew telîsim şah suleyman
çend şebane řoz şêran mesaf
yawan we telîsim zeřîn koy qaf
cehan ferma wat perê îstêqbał
çend te’arufat şah piř kemał
îstêqbal kerdin şazadey maçîn
berdin we telîsim .........Missing sengîn
ye’nî ke telîsim nebîy suleyman
araste kerdin talar û eywan
nûrli’eyn çenî perîyan perîzad
aman we xidmet zeřtac we diłşad
bosan dest û pay duxt şay perî
çenî şay xurşîd bała ’er’ey
nûrli’eyn derdem bosa dest şa
bosaşan dû ’eyn nazdaran yek ca
temam nazaran şewq lîk xwer
berd we toy telîsim ew mah enwer
nîştin we toy qesir temam zeřnîgar
xidmet mekerdiş ew şox nazdar
emîr koy qaf sułtan maçîn
şahan şazade, wezîr guzîn
daxił kerd netoy qesir suleyman
we şadî û zewq kerdin zeř’efşan
qerar dan neřûy text zeřnîgar
payendaz kerdin gewher be xerwar
bezmê berpa kerd ew ’alî neseb
perê şazade keyanî leqeb
we ’îş û ’uşret ewro ta êwar
bezemzemey xas saz û mosîqar
ew şeb we şadî kerdin îsraḧet
ji xestegîy řa bikerdin řaḧet
ji xwab horêzan şêran mesaf
şahan seranser hem emîr qaf
ferma we dêwan emîrkebîr
xeberdar kerdin şêran şêrgîr
temam buzurgan hem şahan qaf
ḧazir bikeran bê ẍedru xelaf
dêwan we te’cîl çenî perîyan
tenûre zenan çîn we asman
heryek řû kerdin we yek quley qaf
seḧesab kerdin şêran mesaf
herçend padşa û emîr qaf bî
herçend saḧêb têp řoz mesaf bî
xeberdar kerdin perê ’erûsî
* ḧazir bûn bewca be «send û řûsî»
ema nexdimet sułtan maçîn
řux mała we xak syay serzemîn
’erz kerd fîdat bam îden êstîd’am
umêdewarim şehnişay řoy ’am
fermayş ferma wezîr namdar
pey meş’ełçîyan ew bot we serkar
êxtyar be ew meş’eł û çiraẍ
pey ateşbazî şêr xoş demaẍ
şazade ferma derdem be wezîr
bawero we ca guftar emîr
xan miḧemed ferma telîsim zeřîn
kerdin we fîrdews beheşt berîn
çend hezar meş’eł espab çiraẍ
pey ateşbazîy şêr berz demaẍ
çend hezar řeng řeng espab ateş
teyar kerd derdem temam muneqeş
şemdanan xas temam ji teła
ji nuqre û bilûr gişt medan cela
çinîn we meclîs şem’ řengawřeng
meclîs bî we řeng butxaney fereng
ařaste kerdin taq suleyman
mereqsan we řeqis temam perîyan
mutrêb û řeqas şeyday mey perest
aman we meclîs řeng zeř we dest
çend hezar perî meşẍûł we bazî
mejendin neway saz mecazî
meymûne xatûn şay noş aferîn
xurşîd ’ałemgîr xaster ji şîrîn
cehansûz çenî mah zeř efşan
baqîy ḧorîyan xurşîd řexşan
bîn wemeşatey mah nûrli’eyn
cela dan weneş wêney ḧûrli’eyn
ya şêwey şîrîn humeylay çil gîs
ya ke bewêney şah ferengîs
çun şikił û şêwey leylê ’ereb mał
çun turk endam bedî’ulcemał
şox xeraman ẍemzey qemernaz
şîrînîy şîrîn şay şekerîn řaz
zuleyxay mîsrî guł’endam çîn
mah zeř’efşan bî xemîn
wêney gewhertac noş aferîn bî
mah cehansûz celaş berî bî
zeřey xurşîdîy ji laş şay şox şeng daşt
şêwey ’ałemgîr duxt fereng daşt
ẍerez çêş waçûn min ji ḧûrli’eyn
bêzna bazař meḧbûban çîn
ewro sertapaş celadan we cext
weçend ’êzunaz nyaşan we text
sułtan îbrahîm şêr řoy mesaf
ferma we şahan emîr koy qaf
berdin weperdey ḧor bê qisûr
dest wist wegerden hem çenî ewḧûr
wepencey bê ’eyb şimşadî bilûr
burqe ji sûret hewada ji dûr
ne şewq şu’ley şems bał zeřîn
medhoş û mat bî diłey agirîn
dem nya we toy serçeşmey zemzem
mepêçyan we hem dest we ban mem
kêşa we aẍoş ewḧorîy bê ’eyb
şad bîn wedîdar şukiraney lareyb
kerdin mezaqan wemetłeb yawan
ewşew ta we sub sewł serawan
sub ke řewşen bî kêşa lîk xwer
lwa weḧemam emîr serwer
ama we bîrûn nîşt we text zeř
mubarek watin şahan serwer
îbrahîm bosa dû dîdey emîr
watiş mubarek şah bê nezîr
xel’et kerd emîr şêr řoy mesaf
bê we zemzeme telîsim koy qaf
řozan we ’eşret we şewq û şadî
seday xoşxiwanan meçya be wadî
ta we’dey çil řoz şêr mest mey
wedestûr pêş keyanan key
be’d çil řoz şêr řoy mesaf
řuxset sitana ji emîr qaf
merexes fermay bendey kemter
biçîm perê çîn ey şah sewer
emîr çend tuḧfey layeq şa daşt
temam şahan be wêneş nedaşt
awerd we xidmet sułtan maçîn
pêşkeş kerd we şah emîr guzîn
çend genc û gewher çend zeř û zîwer
bexşa we şahan emîr serwer
xeylê te’aruf kerd mîr nikû bexet
temam şahan nîştin we řûy text
sułtan maçîn şazadey serwer
nazenîyan gişt şewq beyzay xwer
lwan we toy text we şewq diłxiwa
dêwan hordaştin řahî bîn we řa
şay cehan ferma emîr guzîn
kerdin bederqey sułtan maçîn
nûrli’eyn çenî perîyan temam
bederqe kerdin ḧoran eyam
taçend menziłê şay cehan ferma
mama we xidmet şay cehan kula
ta yawan şahan gişt we şar çîn
cem’en sakên bîn we text zeřîn
çend şebane řoz şewq û şadî bî
qîqey demaẍan zewq zyadî bî
sułtan maçîn neřûy text zeř
wêney keyxusrew ciqey zeř neser
ser we ciqey tac tełay xaqanî
mest laye’qêl şah keyanî
hefit îqlîm şahan nexdimetiş bîn
çem we řay eltaf muḧîbetiş bîn
ḧełqey ẍułamîş kerde bên we goş
ji řay muḧîbet sułtan le’il poş
řoyê nîşte bê sułtan namdar
aman we xidmet şahan weyek car
şahan temamî we mediḧ û sena
watin we xidmet pûr ’adił şa
watin ta mahî nezîr sewr bo
ḧukim to we ban hefit êqlîm bewr bo
heta ke qemer neřûy sema bo
midam patextîy şahît berpa bo
herta îsrafîl dem binyot wesûr
dostanit şad ban dujminanit kûr
emir merexes bikere ey şa
ta biçîm pey zeyd mekan û me’wa
şazade ferma derdem wegencûr
xezaney şahî bawer weḧuzûr
yek yek xel’et da padşahan gişt
en’am da temam şazadey zor mişt
ḧemîd mela şah cehangîr
bosan dest û pay şazadey serîr
cehansûz berdin wetwî kejawe
wetawu te’cîl lwan we řawe
himetxiwahî kerd şeyday şûr ’eşq
wedił xemînî lwa we demişq
.........Missing qemerî yanê eskender
bosa dest û paş xel’et kerd newer
ên’amş bar kerd hîmet sitana
pey qemerye řahî bî we řa
padşay elyas ew şah xeta
xel’etiş poşa barxaney meta
lwa bê medar pey şar xeta
bewxel’et xas řahî bî we řa
şazadey mîsrî hem melîk tûfan
poşa webeden xel’et giran
bosa dest û pay sułtan maçîn
řahî bî we cext şazadey guzîn
cewahêr xas tuḧfey şazade
barkerdin dersat sipaş amade
* ««se’îd» û «mes’ûd» horêzan we pa
poşan webeden xel’et zîba»
bargîrî kerdin genc û gewher
řû nyan we řa pey wiłat û şehir
bosan dest û pay ’ezîz ’adił
wespay wêşan menził we menził
şay entakye horêza we cext
ewîş hem poşa xel’et next
en’am sułtan barkerd we te’cîl
sipaş swar bî her weqał û qîl
bosa dû dîdey sułtan maçîn
řewaney řa bî padşay guzîn
îmcar horêza emîr koy qaf
bosa dû dîdey řoy mesaf
sertapa xel’et zeřî zeřtar pû
poşa kerd newer emîr nîkû
çenî sipay wêş řahî bî we řa
hîmet sitana we şewq û .........Missing
nûrli’eyn kerdişan xel’et
çenî pêşkeşan ew ḧorî tel’et
we ’uzirxiwahî çend cor şazade
bederqeşan kerd ew perîzade
padşay perî şay ’ebdureḧman
çenî sipay wêş perê gułistan
ferheng ne xidmet sułtan maçîn
kemer ne xidmet bestiş weyeqîn
her weqit muşkêłê perê şa řû da
perê îxbarat ḧazir ne her ca
êlaş wat bosa dû dîdey sułtan
wetawu te’cîl perê gułistan
temamîy şahan bade perestan
pey şar wêşan temam sermestan
řahî bîn we cext kes nemend weca
xan miḧemed wezîr tełeb nimana
ama weḧuzûr xan miḧemed wezîr
te’zîm berd wexak sułtan serîr
dest we sînewe midra beranber
nîşan cageş neřûy kursîy zeř
ḧukim ’edałet fereng bexşa pêş
nwîsa řeqem bebir bê endêş
kerdiş wenayb mah ’ałemgîr
bî we padşa xan miḧemed wezîr
herkes ke xidmet kerdiş we’îxlas
ji herdû dinya nîyen baz xwas
padaş xidmet sułtan çîn bî
xan miḧemed wezîr saḧêb temkîn bî
padaş xidmet řebul’alemîn
pêş medo fîrdews beheşt berîn
wadey sełwaten yaweran yar
pey lutif kerem şay buraq swar
çunke xan miḧemed nimek şinas bî
şahî şe’inş bî pey şahî xas bî
sed hezar swar turk cewşen poş
sed hezar kenîz şeyday duř negoş
çend hezar sendûq piř ji cewahêr
bexşa bewezîr çun seng bahêr
çend hezar uştur zaẍey çem sya
çend xeymey etłes zeřbafit zîba
wezîr zeř’efşan nyaş we toy text
hîmetxiwahî kerd řahî bî we cext
ewbî wenayb şeyday şox şeng
bî we padşay temamîy fereng
hersał małyat wêş mawerd we çîn
perê mexarêc şay ḧorî cemîn
’adił şay maçîn negoşey xełwet
sukna bî perê zîkir û ’îbadet
tac zeřnîgar bexşa weferzend
meşẍûł bî we zîkir yektay xwawend
şadîy şukiraney heq mekerd daym
pey ferzend şêr sułtan îbrahîm
.........Missing han îqlîm perê dêw qaf
neḧukim ferman şêr řoy mesaf
hersał bewadey ’eyd sułtanî
maman we xidmet saḧêbqêranî
hedye û tuḧfecat mawerdin we çîn
en’am da pêşan şay saḧêb nigîn
mekerdin şadî ’eyş zemane
be’d ez mudetê meçyan we .........Missing
ferman da sê qesir ’emaret xas
perê nazdaran .........Missing
sazan we te’cîl ustadan çîn
perê sê nazar .........Missing
xurşîd xatûn, şay noş aferîn
heryek çîn wenaw .........Missing
heryek sed ẍułam gurcî kemer zeř
bexşa we pêşan .........Missing
her ’emaretê şewan tawero
seday bezim řezim .........Missing
sułtan maçîn her şew neyek ca
mekerdiş .........Missing
.........Missing