diłtengibûnî xatûney perî le dwakewtinî daye û hatnî bo baxî xurşîd û şeydabûnî be dîdarî
From the Book:
Suɫtan Îbrahîm û Noşaferîn
By:
Khana Qubadi (1704-1778)
9 minutes
452 views
bişîn beser wext xatûney ẍembar
daye firistad pey eḧwał yar
daye namawe neşar fereng
xatûne xanim dił awerd beteng
yek îsim e’zem xwawendiş wend
nîşt nerûy hewa webê çûn û çend
bê perwa lwa şox xatirteng
ta yawa beşar naḧyey fereng
dîş daye ne ewc mu’eleq bîyen
pay amaw lway amuşoş nîyen
persa ey daye îne çi ḧałen
pey çêş şa bałit siftey zuxałen
watiş fîdat bam şay şîrîn demaẍ
nîga ker beřûy xyaban baẍ
îmcar mezanî min çêşen ḧałim
pey çêş sozyan sîne û şabałim
xatûney perî nîgay baẍiş kerd
şoxê nerûy text bedił pesend kerd
burqey gułnarî kêşa nerûy ser
boy ’etirş meyo çun ’etir ’enber
bał we bahobend dane û cewahîr
şewq medo ce dûr çun şu’ley ahîr
medrewşo benaz netoy berg zer
betał kerden şewq ew şems xawer
yaqût û ełmas mirwarî eḧmer
ereqçîn turme «şedey temam zeř»
medrewşo we ban xał û sîne û mem
dehan bewêney serçeşmey zem zem
kemerbend teła besten neřûy pişt
ciftê şemamey teła neřûy mişt
be emir qudret danay bêhterîn
çiman nûr xor řijyan bezemîn
ciqey tawsî danş neřûy ser
sed ře’na kenîz daym dest nezer
wêş nîşten we ban text şîrazî
çenî sed kenîz beşeker řazî
çun baz teřlan tewar xoşxo
çenî kenîzan meka guftugo
wêney cewahêr le’il û xezêne
neřûy zemane nedaro wêne
be wêneş nîyen neřûy êqlîmat
nawerden nexaw dîdey şiş cehat
ce daye fîşter peşêw bî ḧałş
sozya peřan sîne û şabałş
ah serd kêşa ew neřûy gerdûn
watiş ya kerîm hem řeb bê çûn
qudretit firen ḧeyî keremdar
ce qetrey menî hem aw murdar
xełqit kerden şoxê bey wêne
medrewşo beřeng tełay xezêne
cew demda xurşîd xałan lacwerd
meylê belence nîgay hewa kerd
dîş ne bałay ser bedir munîrê
zułf destey kełaf daym diłgîrê
neřûy text naz nîşten belence
maçî şîrînen aman be gence
toẍray gîswan pexiş kerden biław
beřûy cemînda çun xeyatey xaw
şay nazenînan îneş dî we çem
xeylê ḧeyran bî, xurşîd ’ałem
bexwah naxwah ce bîm selam kerd
xatûne cewab be kelam awerd
xatûne be naz şox xatir teř
ama be payn nerûy text zeř
dest kerd negerden xurşîd diłkêş
řûy nazenînş awerd belay wêş
xurşîd wat dułber to ce kêyanî
to perîzadey ya ce însanî
xatûne watiş şay şîrîn kelam
emin kinaçey ’ebduřeḧman şam
meymûne xatûn dułberen namim
meḧbûsen şahan êqlîm bedamim
aşnam çenî şazadey salar
cew bone amam be seyr gułzar
min şewq xidmet to neser daştim
amam ser nexak qedem guzaştim
çenî to suḧbet bidarîm behem
bekam wêman bê pejare û xem
xurşîd şineftiş ce xatûn ey řaz
qet’en be cewab ama be awaz
xatûney perî dest nerûy gerden
dem kota nekerd nesuḧbet kerden
xurşîd ẍafił kerd be suḧbet kerden
daye midran keç kerden gerden
be îşare wat şay wefadaran
bişo bawere şazade û yaran
daye êd şineft çun bad seba
betundî û çabuk yawa be ewca
yawa be xidmet şêr beçey xûnxiwar
watiş fîdat bam şazadey salar
xatûney perî ha ne seḧin baẍ
çenî xurşîd şa bekeyf û demaẍ
ew watiş bemin be îşarey dił
şazade bawer beseyran guł
* sake êd şineft şazadey ẍembar
şikofa çun guł gułbaẍçey behar
horêzan we pa yaran be demaẍ
nekerdin midar ta yawan be baẍ
dîşan ke nîşten xatûney perî
çenî xurşîd şa be suḧbetgerî
girdîn be’î’zaz kerdişan selam
selam cewab da şox cemîn cam
şazade dya cemał xurşîd
ce pa ta we ser lerza wêney bîd
peşêw bî ce ’eşq bê hoş bî melał
xatûne xanim awerd be xeyał
şazade çun xak derûn keyl ẍem
kefit nexak pay xurşîd ’ałem
watiş çêş mebo gyanim bo fedat
aro bisparûm gyan ne qedemgat
xatûne watiş şazadey ẍembar
wêt sibuk meker ce xidmet yar
hîç bakit nebo şay wala meqam
sed çun xurşîd mekêşî nedam
elḧemdulîlla dewłet yarten
du’ay gencul’erş mededkarten
wêt sibuk meker gyanim bo fîdêt
wezîr û nedîm te’ne meden lêt
xatûne ewend kerdiş diłdarî
sułtan farêẍ bî negryew zarî
xurşîd şa ferma ferş awerdişan
cagey xoş feza tertîb kerdişan
cagey xoş feza çeşmendaz feraẍ
neher sû nezer bedîdar baẍ
nîştin nerûy text hem zanûbe hem
perwane destûr nedewran şem
perîyan awerdin pyałey bade
esasey mutrêb kerdin amade
xatûney perî wêş besaqî kerd
camê mey perê noş aferîn berd
camş gird be dest be pencey gułřeng
teklîf kerd binoş nazar fereng
xurşîd dułber dest perê cam berd
camş gird bedest şazade siperd
hem şazade cam şîrey gułřengî
kerd be te’arf şox ferengî
xurşîd ne ḧeya ser bedaman berd
esłen bedîde nîgay cam nekerd
xatûney perî herçend koşiş kerd
ce ḧeyay şîrîn dest pey cam neberd
şazade êd dî horêza ne derd
girîban wêş parepare kerd
dest kerd bezarî xak řêza beser
zamş xeter bî ce new zyater
şay noş aferîn dest pey xencer berd
xencer îşarey we sîney wêş kerd
watiş be xurşîd ey şay cemîn cam
sewgend bezat yektay layenam
ernestanî cam nenoşî beşad
şerit bo nedestit ’umirim dem we bad
ce bê ’îlacî xurşîd ’ałem
camş send cedest şazadey piř ẍem
berûy kef awerd şerab gułřeng
noş kerd beherḧał şazadey fereng
gułbang noş bad xêza neyaran
binoş noşt bo şay wefadaran
cenoş bade şay şîrîn endaz
seday zîl û bem xêza be awaz
şazade dya şox saḧb senc
umêd ḧasił kerd مەیاۆ begenc
îşare kerdiş pyałan mey
awerdin perêş menoşa pey pey
guł xenderan bî şox guł beden
merêza nedem guł xermen xermen
şazade dû dest perê sîneş berd
nazenîn destiş begerden awerd
çun tûł lewlaw pêçyan we hem
pêç werdin çun pêç ejdeha û erqem
gaga dest mewerd pey noş aferîn
pey diłnewazîy şox guł cemîn
ta weqit xeften wey tewr wiyaran
cew dima xurşîd watiş beyaran
* bişon be menził mekan wêtan
ferda şew qesirim menyom neřêtan
ferda şew bezmê mawerûm nekar
kes nekerdebo nerûy řorgar
dûbare ce new qedem baweran
ey mawa û mekan muzeyyen keran
ferda şew ce baẍ sebzey gułistan
birêzîn boy mişk ne ceyb daman
şazade watiş bende řazîyen
bełê çêş kerûm fetway dił nîyen
* xurşîd horêza hîmet xwahî kerd
teşrîf be camrêz ḧeremsera berd
şazade beser sergerdanewe
melûl û matem be derdanewe
mewat min îmşew cergim girten taw
nimebo xamoş besed kûzey aw
xurşîd şî beqesir zeř’endûd wêş
xedeme û kenîz xeber persa lêş
watin canman sergerd řat bo
nûr dîdeman ne qedemgat bo
teşrîfit nekam baẍ û bustan bî
tawis řengîn kam gułistan bî
ey sergerdit bo naḧyey fereng
pey çêş dêr amay direngen direng
ama be cewab nazar dułber
nedurc dehan řêzna gewher
ce seyr baẍ bîm nîgam kerd nextê
ama pedîdar nehewa textê
şoxê nerûy text girte bî qerar
řengînter nereng laley newbehar
horêzam we pa kerdim selamş
cedmay selam min persam namş
wat kinaçey ’ebdureḧman şam
ce guł û gułzar îremen mawam
padşazadey ew gułistanim
meymûne xatûn menşûren namim
aşnam çenî sułtan îbrahîm
arezûmendim bwînim daym
* zanam teşrîfiş ne mekan ton
pey ew megêlom peydaş bikerûn
ne teqdîr ḧeq neberzîy demaẍ
amam řam keften we’ey qesir û baẍ
ta wext xeften kerdîn giftugo
cewdima lwa şay şîrîn şiko
teklîfiş kerdim barûm weyane
xeylê dest awêz kerd we behane
mewat şazade întîzarmen
îse zerûren xerîdarmen
mebo bwînûm îmşew be menził
pey řaḧetîy gyan pey saknîy dił
* we’dey ferda şew çenîş kerdenim
byan beser weqit bade werdenim
* bełê çenî ew suḧbet mekerîm
nam xudawend dem dem mewerîm
daye êd şineft xoşḧał bî temam
wat fîday to bam şay şîrîn kelam
xeylê xast kerd ey nûrî dîdem
firîştey şerîf ḧeq aferîdem
to çenî perî û şazadey çînî
ce dostîşan nekey zerer mebînî
newaziş biker be xatir guşad
neřoj tengida meyo be îmdad