meymûne xatûn awatî dîdarî şazade dexwazê û daye beřê deka bo lay nawbiraw
From the Book:
Suɫtan Îbrahîm û Noşaferîn
By:
Khana Qubadi (1704-1778)
3 minutes
530 views
cew teref dîsan xatûney perî
çenî kenîzan be suḧbetgerî
nîştebê we naz şay şîrîn cemał
şazadey çînî awerd be xeyał
daye tełeb kerd wat ey demsazim
řefîq diłsoz meḧrem řazim
arezûy dîdar şazadem kerden
hîcran dûrîş zor pêm awerden
dexîlim daye nekerî direng
midarat nebo ta şar fereng
bawer xeber sułtan perê min
ta xatir nederd sewda bo sakin
daye perwaz kerd new zêd û mawa
derdem dersa’et wefereng yawa
lwa be toy baẍ besed ’îz û naz
ta şî be nezdîk şay gerden feraz
dîş nîşten netext wêney gułxermen
merêzyo boy mişk sertapay damen
daye sewday şox xurşîd nedił berd
řaz xatûney perî xamoş kerd
be kêrîşim û naz ew xurşîd cemîn
ne řûy text zeř ama be payn
guł toto xeften keften we hemda
şikuften beşewq neḧełqey xemda
ser berden be ewc dirextan berz
serawan suheyl midran hezar terz
ferş endaz baẍ medaxił be guł
wenewşey weş bo řeyḧan û sunbuł
lale û yasemen ne řûy sebzey baẍ
boy ’etir û ’enber medo ne demaẍ
* sewł çinaran ne řûy ab řeste
nîgar me’ab guł besten we deste
dirextan berz ’er’er çinaran
kerden goşmałî sipay sitaran
melan çend hezar ne řûy sebzepoş
mirwarî ce ferq kiławan meyo boş
nîşten be řûy guł heryek neşaxê
heryek be sozê heryek demaẍê
bułbułan be soz xoş awazewe
hezaran besoz diłnewazewe
hey hey duřacan gułan weş bo
qumryan gim gim hudhudan po po
murẍan heryekî be hezar awaz
mekeran tewḧîd ḧeq cêlwesaz
ab wêney gułab saf xoşgewar
carî bîyen ne řûy sebze û mîrẍuzar
çend nazenînan tuḧfe amade
ře’na qametan ferengî zade
gişt nazk newhał taze newřeste
midran belawe deste be deste
ne pêş û nepes xidmetguzaran
sef kêşan çun guł eweł beharan
wêş wêney şabaz ne řûy text zeř
zułf be ab şor gonaş mekerd teř
çun lîsk aftab serkêşa we ber
bełke nexurşîd zeř’efşan zyater
çun nûr xurşîd neburc çwarem
nîşten ne řûy guł bew berze tarem
cela da xałan şox şem cemîn
watî giř senden temam serzemîn
ełqeçîn turme temam lałda
medrewşan we ban egrîce û xałda
sê hezar kenîz zułfan ’enberîn
midran ne xidmet ew şox şîrîn
daye nîga kerd we tenxiway ey baẍ
medrewşo çun şewq şu’ley şewçiraẍ
ce terkîw řendîy şox diłřuba
daye sersam mend hem ne řûy hewa
ḧeyran bî ne şewq berûy hewawe
nepay werş bî ne pay dimawe