řoştinî sułtan îbrahîm bo koşkî suleyman û şeřkirdinî legeł ’elqem dêw
From the Book:
Suɫtan Îbrahîm û Noşaferîn
By:
Khana Qubadi (1704-1778)
7 minutes
497 views
xana guş bider çerx keç neberd
kê bedam sext mubtela nekerd
zehir hîcranş be kê nenoşa
camey derdu ẍem be kê nepoşa
kê newist ne gêç mehlekey helak
sîney kê be têẍ cefa nekerd çak
çend nazdar şox berden be toy xak
şîrîn ermen leyl û derûn çak
çend meḧbûb xas zułfan ’enberîn
xatûn xatûnan zułf û xał şîrîn
çend şehryaran saḧêb zor û sam
ce dinyay bê po, koç kerdin temam
şazade hewes dîdar yar kerd
ahîr ’eşqiş ce new coş awerd
řux tełeb kerdiş watiş ey yarim
hamřaz û hamdem hem mededkarim
mer nimezanî min çêşen karim
be genc û gewher key xerîdarim
pey kê sergerdan wêł wiłatim
pey kê nehîcran derd û ẍem matim
řux wat fîdat bam îtła’im nîyen
hîç nimezanûm metłebit çîyen
her metłeb darî ersed muşkiłen
(înşeła) be dest bendet ḧasłen
şazade yekser serguzeştey wêş
temam ḧałî kerd guzarşat pêş
mebo to be şewq be şadî û demax
zûmin biberî be toy qesir kax
bizanûm eḧwał mah cehandar
ḧałş çi tewren çon girten qerar
řux wat ’ezîzim minet begyanim
min be emir to bende fermanim
er peyk eceł min nekero qest
mebo nazdarit bisparûm bedest
şazade bew ḧerf xeylê bî xoşḧał
kerdiş şukiraney xuday layezał
ewşew cew mekan girtişan qerar
seḧer ber’ama padşay nehar
murẍiş tełeb kerd, watiş xoş aheng
mebo ce karim nawerî direng
min biber be kax şah suleyman
belay nazenîn sewł xeraman
řux wat ’ezîzim minet be gyanim
min be emir to bende fermanim
herçî mewaçî we ban dîde
meberût bew ca wer ce sifîde
şazade watiş be yaran wêş
ney ca binîşin bê xof û endêş
min meşûm weceng mel’ûn napak
(înşeła) be tîẍ mekerûş helak
we’dey sê řoj binîşin ney ca
nazar mawerûm bey zeyd û mawa
er sê řoj namam fîkir wêtan ker
espab û řextim perê wêtan ber
ema (înşeła) be meyl û demax
nazar mawerim netoy qesir û kax
şîwe ban puşt ew murẍ çalak
nîşt ce řûy hewa řû kerd ne eflak
ta wehefit sa’et berdiş bewmekan
yawnaş bekax qesir suleyman
be’endek endek awerd we payn
nepay qesir zeř nya we zemîn
murẍ ke bwatiş şêr diławer
merexesim ker ey şah serwer
’elqem bizano pêm mebo duşmen
’edawet kero ewhem çenî min
der dem şazade merexes kerdiş
midara nekerd tamekan wêş
şazade řû kerd be maway dułber
şî nedlê kax netoy qesir zer
nîga kerd cemał weqtê dî beçem
çun guł pejmurde hem matem û ẍem
du’a mekerd û mesoza û mewat
ey yar şîrîn řoḧim bo fîdat
ye pey çî meylit derbarem serden
serit necamey xamoşî berden
mer nimezanî min siftey daxim
gîrugiriftar telîsim kaxim
key řeha kero bwînut we çem
ta sakin yibo ce xof ’elqem
êd wat ce naga la kerd welawe
dya şazade midran we pawe
herdû kerdişan nîgay çem we hem
herdû bê hoş bîn xecił û matem
ce dimay satê baz aman be hoş
herdû çenî hem girtin ne aẍoş
mewana û mewat, mesoza çun şem
derûnş bî keyl ce pejare û ẍem
mewat nazenîn derman zamim
metłeb û murad meqsûd kamim
pey dîdey syat seru nazperwer
wêm wist ne cefay bê ḧed şor û şer
pey to wêł ḧût, ẍerq derya bîm
çun mecnûn wêł çare sya bîm
pey to cezîrey waq waqim tey kerd
goşt ademzad zengyanim werd
pey to derdeda mat û ẍemgînim
bîła sergerdan noş aferînim
bał çem hordaşt şay şekerîn řaz
yek cehem dîger dîde kerdin baz
şazade dû dest negerden awerd
wêş piştan be tûł seru bałaş kerd
çun tûł lewlaw pêç werdin behem
menoşan şerbet ce çeşmey zem zem
le’il leb noşa herta ke tawa
bewêney sabir bemurad yawa
şazade watiş ey řoḧ pakim
ey ba’îs fewt qatił û helakim
ey beła çêş bî to ama neřat
to awerd bey zeyd bey mawa û bîsat
ye çun ji yanî ney qesre çołe
asîb nekêşay new dêwe ẍułe
ney qesir çułe kê bê hamřazit
kê mebosawe dû dîdey bazit
dułber serguzeşt wêş wana perêş
seranser eḧwał yekser watiş pêş
cey giftugo bîn bê xeber nekar
ce naga ’elqem ama bedîdar
nîga kerd mel’ûn zişt bedgewher
nîşten şazade ce pehlûy dułber
ne’rete pêka ziban kerd guşad
kê beto waten ey ademîzad
şazade çabok dest da be şimşêr
řûkerd ne mel’ûn wat ey nadlêr
watiş mel’ûn dêw gumřay bê şon
me’şûqey emin key layeq be ton
to noş aferîn bey ca yawnay
ełbet min helak yamurd nezanay
êd wat û ẍura wêney ebir tar
řû kerd be mel’ûn dêw nabkar
bełê no batman ce fûlad sext
negerdenş bî ew dêw bedbext
da negerdenş nerûy sitêze
tîẍ yawa be tewq bî besed řêze
nobet kefit be dest dêw bedgewher
dest berd şazade berd we ban ser
şana bedoşda bołend bî ta ewc
berd beřûy deryay muḧît piř mewc
nyaziş êd bê dêw bê îman
buzo negêc beḧir bê saman
şazadey serwer dest girdiş demaẍ
dest berd girtiş dû goş û yek şax
dêw herçend bezor bazû guşad kerd
çare bezor dest şazade neberd
bîn be gilûle kerdişan şêtab
axir herdûşan ẍerq bîn neřûy ab
ẍerq bîn nederyay mewc piř xeter
ga meşîn bezîr ga maman we ber
axir peyda bî nehengê bê řam
şazade û ’ełqem herdû berd bekam
şazade cewdem ah serd kêşa
řay firset nedaşt berşo nederya
ne qelb wêşda xeyałat mekerd
mewat ey dawer tak tenyay ferd
eger řeha kem şax dêw nedest
yekbare ne pêç derya mebû pest
eger dest ne şax ’elqem bikem bend
mewînûn gezend cekam neheng
mer zat subḧan danay keremdar
bido necatim ney beḧir xûnxiwar
çunke řezaş bî danay kirdigar
řux nerûy hewa ama bedîdar
zana şazade meydanş tengen
gîru giriftar mekir nehengen
mînqar diraz kerd pey gełûy neheng
şazadey salar awerdiş be çeng
şazade fewren tekan da bewêş
bê ters û bê bîm bê xof û endêş
fewren şazade bê seda û bê deng
řeha bî nekam luqmey ew neheng
şî we puşt murẍ new deryay ceycûn
be emir ferman padşay bê çûn
řahî bîn we řah herdû be diłşad
ẍem û ẍuseşan temam da we bad
bake bimano ey řaze ney ca
bişîn we serwext şox diłbiroba