zułeyxam nare
From the Book:
Dîwanî Xanay Qubadî
By:
Khana Qubadi (1704-1778)
2 minutes
1263 views
zułeyxam nare, zułeyxam nare
zułeyxam cemîn şewq nehare
ḧacîban dû qews, qeza kirdare
mujeş xedeng coy esfendyare
kitûnî darat, jar alûy jare
nêş ene beter, mer gestey mare?
dîde çerx’asay badey xumare
nîşaney enguşt perwerdigare
çemberey çerxiş ’eqreb asare
satê we sed řeng nêşiş we kare
dû destey kiłaf ’enberboy bare
boş xaster mer boy mîsk ’etare
gah elfen, gah kaf, gahê meyxiware
gahgah we seywan, nîmřes enare
gonayî gułgeşt, sêf xansare
giřeş we wêney daney enare
er şa, er gedaş, eger xunkare
bedter nafşan dił bê coyare
bênê nexiş zeř, tełay efşare
şem nîsbet şahan, pêş întizare
leb, le’il ’eqîq, metay mehare
xara ce řomat bełx û buxare
ferhad pey dînş xerîk xare
xusrew pey xałş ciger sedpare
gahê netonim, gah ne guftare
gah şehd, gah şîrîn, gah gewherbare
dehen serçeşmey xizir řehdare
eskender we cext pey ew coyare
sî û dû daneş gewherbêz bare
bîrş ne mercan, bom gułnare
zinc û zenexdan, top zeřkare
encûm ne dewirş sef sef hezare
xalê neser lewḧ zenciş dyare
qettał îman, heşt û çware
ser lewḧ sîneş dû newřes nare
noşşan şîfay derd bîmare
dû dugmey yaqût, weneş dyare
giřeş çûn ełmas, tac xûnkare
naf, naf ahûy çerdey kosare
ḧeyatbexiş řoḧ merdey mezare
kaf û naf û genc, ne çem pêware
cayî sim ẍezał wełg gułnare
poşakim ce kar kul xeberdare
xanaPen name senagoy ey senemçare