san’î karan
From the Book:
Dîwanî Xanay Qubadî
By:
Khana Qubadi (1704-1778)
3 minutes
1240 views
san’î karan, san’î karan
şukiranem êden, san’î karan
gołan kerd peyda, ne diłey xaran
nûrbexiş cemîn sîmîn ’uzaran
maşełła ce şewq barî subḧanî
çon kêşa teswîr ḧorî řîzwanî
qametit şîrîn zułeyxay sanî!
bała lewḧ sîm erjeng manî
herwext bałay ew lêm dyar mebo
dinya ne dîdem tîr û tar mebo
turbey řengînan, syay xuten řeş
sef daden dû sef, çun supay ḧebeş
nîmxufte û xamoş, nîmyaẍî û serkeş
dił ne samşan keften mişewweş
korpey mîqraz gaz, gah pexşen, ga cem
mer şewq şefeq beyzay subḧidem
min ce sewdaşan îcazem besten
çe perwam ce xof zigar û zeten
hîlalen, qewsen, seyfen, semsamen
te’sîr merkeb, cem nimay camen
meqsûdiş we qews dîdey ahû xo
’arf we îham, pêş maçan ebro
dû seyf da, ya sał řoy řezim xanan
mer peyk peř dał, kêşî keyanan
sya nimûney zaxan syaxan
syater ne pey dił sifte daxan
bê bade mexmûr, bê surme syan
’eynen nergisen, îsimş wanyan
munşîy qełemzen, karxaney bêçûn
dû nûnş kêşa, herdû ser be hûn
le mabeyn dû ’eyn, ta we fewq mîm
elf, elf war, kêşyan ce sîm
her wext boy nesîm şew bibo carî
keylen nefîs ḧuqqey ’ettarî
kerden we dû nîm, be sun’ barî
bîyen we seḧab, daney mirwarî
durc peř gewher, xezaney hurimz
ne yaqût deyr, yaqût qirimz
gonay wała řeng, duřři’asay cedweł
şecer selc řeng, bestey hûn hemteł
wełg hemqerîn, zîřey gułnar goł
guł kam guł? ełwend lêş mebo ḧasił
mengułe ne durc le’il bedexşan
eḧmer bo gułfam, xassey duř’efşan
bedrê sazna dû heftey kamił
nîşiş çun ’eqreb ne cergim da çił
gah řîşey xałan wêney lał dêz
tuḧfey şapesend, xurdey mawî řêz
medrewşo ne terḧ daney ferzane
be ca bawerîn secdey şukirane
horgirten řewtê çun gewher ne durc
çun qemer tilu’ mekêşa ne burc
we ’eqîdey min, ḧulim ḧebałe
we şer’ şerîf, sîẍey qebałe
her wextî ew dem mebo so lêşan
çun neqiş metîn nimano pêşan
menşûrnamey ’eşq, ce no nimebo
xane ser’efraz bałay to mebo