desřêjî lawan
From the Book:
Bargey Yaran
By:
Hemin Mukriyani (1921-1986)
3 minutes
1050 views
biřo řêwî besyetî çawnezêrî
pelamarê mebe bo lanî şêrî
gutûyane le lanê derpeřê şêr
hemû dijmin bezêne mê û nêrî
meye bo em çya nînok şikêne
dizî sîrme û geřokî germesêrî
betîkî sext û estem hełmeřoskê
xerîkî şaxewanan hełbidêrî?
eto û řijd û řike û hełdêr û tîreg
le gyanî xo meger bêzar û têrî?
biçowe bin giřałk û kendełanit
eto key fêrî nêw swêsin û kinêrî?
biřo kilkit binêwe nêw gełozit
hełatin îşî xote başî fêrî
le pêş toşda şehenşahanî xwênřêj
xerîk bûn pêy nehêłn xêr û bêrî
lemêje fêre kurdî pakî laşeř
berengarî, fîdakarî, dilêrî
eto her qatłî zarok û çûkî
bedîl û pîr û bê enwa dewêrî
dena bê şik leber desřêjî lawan
debê wek bařekew her xot weşêrî
ḧîsabî karî xot ger baş dezanî
le mafî ême boçî xo debwêrî?
ke lêt řûnake nahemware řêga
edî bo řê beřêdar naspêrî
eger bałî humaş bê, sêberî to
ke mafî kurd nedey naçîte jêrî
’edalet ger hebê pêwîste her kes
le małî xoy bika xoy çawedêrî
çyay zagrose zurg û berdełane
felek neykird û naka berdibjêrî
betank û top û mêkî xot menaze
ke şwan kirdî besenger berdebêrî
denêrî çoleke bo řawî başû
ke cundî bo şeřî cûtêr denêrî
ke řûnakbîr qełem řoka le çawit
keřulałî newek her kutir û kwêrî
le buxtan û dirot bêzare yekser
le şêxî xaneqa ta pîrî dêrî
gelî kurd destî da çek hate meydan
temaşay gewre şwan û şengebêrî
ke tirsaba le kuştin toremey kurd
le asmanî jyan win bû sitêrî
fîday kořî xebatit bim kiçî kurd
ke gyanbaz û fîdakar û bwêrî
eto serberz û řûsûrî û bexwênit
gułałey sûrî azadî dedêrî
fîday lûley tifengit bim kuřî kurd
ke dujmin bew tifenget nabwêrî
bexełkî řageyand dest û tifengit
dijî zordarîy û daxwazî xêrî
bijî pêşmerge rołey bawefay kurd
ke natirsî le ře! we tał û swêrî
le aştî xwazîy û sułḧa nimûney
le ḧemle û hełmeta bê bak û mêrî