dułber
From the Book:
Dîwanî Seydî
By:
Seydi (1785-1849)
2 minutes
1169 views
dułber dił estanay ce min, şerit î diłistanî nyo
cewirş medey, řenciş meker, xo kafiristanî nyo
şerten bikêşo dił cefat, ba yadgar mano ce lat
to bot ne dił, xofî xudat, xo kafiristanî nyo
amam ne řat pî cestewe, gêrem siłom çît nestewe
pî ḧałî cestey xestewe, xo kafiristanî nyo
hey newnemamî baẍî dił, pey to syan beydaxî dił
sa merhemê pey daxî dił, xo kafiristanî nyo
hey řendê tuḧfê nazenîn xałit ce ’enber, guł cemîn
sa merhemê, der pey birîn, xo kafiristanî nyo
bîmaru tom, ḧoru perî, er xwahêşen, er ser serî
şerten ’eyadetman kerî, xo kafiristanî nyo
dadim pene, çiłê û «řyon» qîmetşene, sonem gyon
çî mamełe megnem zyon, xo kafiristanî nyo
wêł wêł megêłam ko be ko, derdim giran bê řo be řo
sa ḧał û derdîm perse to, xo kafiristanî nyo
terk û wiłatît kerdimo, jarawu dûrît werdemo
perse be ḧałî derdemo, xo kafiristanî nyo
’uryan û kełpoş, şeydaw byaban gêłeno
da perse pey kê wêłeno, xo kafiristanî nyo
er şerit û beynit wîrten, xof û xwawu pîrten
bo lam, egerçî dêrten, xo kafiristanî nyo
yam bare teşrîf yanemo, ya dûro perse ḧałmo
terse henasey kałmo, xo kafiristanî nyo
qewman, xwêşan, hamseran, lome û menaman çî keran?!
xasen te’esufman weran, xo kafiristanî nyo
seydîPen name girano elwîdaş, hîcran medo herdem cefaş
hey pey xway beydê welaş, xo kafiristanî nyo