diłe zuxał bay
From the Book:
Dîwanî Seydî
By:
Seydi (1785-1849)
2 minutes
861 views
diłe zuxał bay, diłe zuxał bay
be ahî qûret, be koy zuxał bay
çenî ẍem, xerîk şadî betał bay
çûn murẍî bê peř, şiksite bał bay
yaxwa ce asman ẍezeb waro lêt
ye to kerden pêm, nejneway ser şêt
çend watim be ’eşq bargey îmaman
megne we sewday newtûł nemaman
bê sûden sewday ’işqî nazdaran
nazdaran ta ser wefa nedaran
er to bikêşî sed sał cefaşan
ta ser çenî kes nyen wefaşan
neşneway pendim, çûn napesendan
ta keftî çûn «seyd», ne damî řendan
ta pêçyay be qeyd bendî damewe
ten be êş û derd, zox û zamewe
ne be şew qerar, ne řo xawit bê
pey dûrî dułber, gilarawit bê
diłe her şeydaw wêłû nefam bî
cefay yar kêşay, sa wefaş kam bî
axir celay yar xo keftî we bêz
pare pare bay dek we têẍî têz
nařewaw kesas, kes nesendey wêt
çeqyay heřgaw, eramendey wêt
xicłyay be derd çerxî puř sitem
hergîz řoy şadî newînî we çem
be deşney qesab bikêşa qîmet
to seydîPen namet kerden pûłî bêqîmet