badî ’etramêz
From the Book:
Dîwanî Seydî
By:
Seydi (1785-1849)
2 minutes
1251 views
badî ’etramêz, badî ’etramêz
badî gułşen gerd, badî ’etramêz
peyk berî ’aşiq, nîme şewan xêz
boy nafey tetar, ne řwî sara řêz
çûn ’etar be çîn zułfî yarewe
ama be boy ’etir ’enber barewe
persam ey ’etar, ye çêş barten?!
wat: «boy ’etrî zułf gêsûy yarten»!
be te’cîl wiyerd nekerd mudara
şî ne řûy deşt û keş û kow sara
sake boy ’etirit be gułan yawan
gułan xêzyan pey ’ezmî dawa
«sunbuł» çenî tîp «wenewşe»y baxan
«çinûr» nepay herd «şewbo»y serşaxan
qîblem taseḧer guftugoşan bê
daway hamşanî zułfî toşan bê
axir dawaşan «tan û poş» nebê
hîçkam boy ’etrî zułfî toş nebê
«sunbuł» matem bî bezarî û xemnak
«wenewşe» ce şerim, sucdeş berden xak
«çinûr» peşêw bî, dił be derdewe
«şewbo» şeyda bî, şew we herdewe
fîday zułifit bam řendî cemîn lał
zułfî to bazař gułan kerd betał
nek sewday zułifit xasey gułanen
sermayey daway derdî diłanen
ane kam diłen wêş be dił zano
ce sewday zułifit peşêw memano?
er şêx, er mełła, eger derwêşen
sewday zułfî to, gird ’alem pêşen
seydîPen name çûn ce dax tay zułifit wêłen
sadaru sersam byaban gêłen
sake dêwanen êden tegbîrş
tay zułfî syat bo be zencîrş