em karesatey dwawe xom bîstibûm we ḧesen...

em karesatey dwawe xom bîstibûm, we ḧesen begî cafîş boy gêřamewe, witî:

řeza şa taze bibû be şay êran, heç begzade û aẍawatî ew wiłatî kurdewarîye hebû koy kirdibûnewe bo ewe qiseyan legeł bika û řûy diłyan lepaş eḧmed şa bikate xoy. hemû begzade û aẍawat bewpeřî řêkupêkîyewe xoyan řêk xist û ew tedarek û cilubergey ke şayanî dîdenî řeza şa bê leberyan kird. silêman xanîş yekêk bû lewane. begzade û pyawî gewrey ew wiłate le deştêkî panda řîzyan bestuwe, řeza şa be berdemyana eřwa û çak û çonyan legeła eka. řeza şa hendê eşrefîy zêřînî be nawî xoyewe dařiştuwe, eşrefîyekan wan lenaw sînîyekî zîwda, yawerekey beser destîyewe û be şwênyewe, řeza şa egate berdemî her aẍayek dest eba yekê lew eşrefyane heł’egrê û eyda be aẍake, lêreda mebest eweye ke lutfî şahaneye beranber bew serokane, newek eşrefîyeke.

egate berdemî silêman xan (ke ewîş le serekeda řawestaw) řeza şa dest eba eşrefîyeke heł’egrê, silêman xanîş destî řagirtuwe, eyewê bîxate naw destîyewe eşrefî da’ekewête ser erz û nakewête naw destî silêman xanewe. řeza şa çaweřêy ewe eka ke silêman xan danewêtewe eşrefîyeke hełgirêtewe. silêman xan bêzî nayenê danewêtewe, ewa nizîkey dûsed begzadeş lew naweda řîzyan bestuwe, řeza şa tozê řa’ewestê seyr eka silêman xan eşrefîyeke hełnagrêtewe, ewîş ekewête teqewe, dest eba eşrefîyekî tir heł’egrê û eyxate destî silêman xanewe û leser îşî xoy eřwa û dest ekatewe be geřan be berdemî řîzekeda. ’alemekeş hemû çawyan lemeye.

lepaşa le silêman xanyan pirsî boç danenewîtewe merḧemetî şahane hełbigrîtewe, ke řezaşayş leber demta westa bû? witî: nefsî xom fire we beriztir ezanim lewey ke danewmewe bo merḧemetî şahane.