le serdimî xoya le suleymanî core řabward...

le serdimî xoya le suleymanî core řabwardinêk hebuwe, yekêk lewane buwe ke deste deste û bere bere seyranyan řêkxistuwe û çûn bo seyran. yekêk lewane seyranî «şewkêł» buwe ke eçûn hemû tifaqêkyan ebird û şew lewê emanewe.

şêx miḧemedî şêx celal gêřayewe witî:

carêk tucarekanî suleymanî le behara ko ebnewe, binewbarge řê exen û eçin bo pîrî şewkêł. mela ḧememîne şête hebû, ewîş legeł xoyan eben, «pîrî şewkêł» yiş dûre be şarewe. makerêk dênin mela ḧememîn swar makereke eken, pêy ełên to be pêyan nageyte ser pîrî şewkêł, swarî em gwêdrêje be, mencełê mastîş dênin ełên em mencełe masteş le berdemî xota danê, destî pêwe bigre, wirya be neřjê? carcar le dwawe sûke neqîzeyek be kerekewe ejenin, ker heł’etîzênê lewaneye mela ḧememîn dakewê. pêy ełîn mela ḧememîn bem core to nageyte pîrî şewkêł, etirsîn dakewî û mencełe mastekeş biřjê, çak waye datbestîn beser kerekewe, mela ḧememînîş ełê başe. emca gurîsêk dênin şetekî eden be ser kerekewe, be corêk eger ker xoyşî bigewzênêtewe mela ḧememîn her danekewê.

maweyekî baş eřon û nizîke û hewraz ebnewe, mela ḧememînş be swarî kerekeyewe le pêşeweye, emca dênin nêrekerêkî řûtî tořî behar exene dway makerekey, lemeř mela ḧememîn. nêreker ke çawî be kefeł û bin kilkî maker ekewê, bonêkî pêwe eka, ḧeytekey yereq ebê û be bê perde epeřête ser maker û limozî tund eka lenaw şanî mela ḧememîn. mela ḧememînîş besrawetewe natwanê cûłe bika, dest eka be cinêwdan û ełê em nêrekere segbabe dûr xenewe, leber zeřezeřî nêreker kes gwê be qisey mela ḧememîn nada, nêrekerîş leber ewq û zewq řêgay lê têk eçê û wekû têła hemû car eyda le bin řan û piştî mela ḧememîn. mela ḧememînş nawêrê dest le mencełe masteke berda, lay waye eger destî lê berda û mast biřjê, xwa ẍezebî lê egrê.

emca be hemû dengyewe bang eka: segbabîne bên kêrî em nêrekere bigirin ba le nwêjim nebat.