aẍem karîyen
namey jimare 3 bo hawserekey, ’elî ekber xanî erdełan, nasraw be şirf almilk
From the Book:
Şî’rekanî Cehanara
By:
Jehanara (1859-1911)
2 minutes
928 views
aẍem karîyen ...
bîla ce dûrît derdim karîyen
her şew ta be řo bêqerarîyen
kul bełay beřast şîn û zarîyen
ewende bêḧed tasey tom kerden
dûdî henasem ce ferq wiyerden
dîdem întizar amuşoy řaten
xeyał her ne fikir wêr sewdaten
sersam sadar çûn leylê asam
şadî û zewq ne řûy derûn herasam
çunke bey řenge, derd karîmen
derd bê derman, nadyarîmen
bo taye kakoł, qetranî şew bo
wazkere ne ferq, ’etir eşedbo
bikyane perê zamdar zamit
dił be sêx biřyan, bałay nemamit
leḧzeyek nimeşo nam tom ce hoş
ta we řoy merden, nîyen feramoş
qesemim warden, řoḧ baron we ber
binêro ne řêt, ’umir û gyan û ser
qesem be ayey sî cizmey kelam
pey to xaw û xurd lêm bîyen ḧeram
sewgend bew bałay, nazenîn endam
ẍeyr ce to zewqim ce gişt kes ḧeram
ema to pey min, nîyenî we teng
bêřeḧmî bêřeḧim, dił sengî dił seng
meylit çûn caran cey wer nemenden
me’lûmen dendan, kenîzit kenden
werne yanê çêş, bînayî dîdem
’umirim, ’ezîzim, hey berguzîdem
ye xeyłî wexten, meylit kerden kem
kot kerden celam xerman xerman xem
řo ce řo fêşter meynet medey pêm
weła bêzarim, min ce gyan wêm
ce tenxiway newîd xem peym mekyanî
we şerit werter hîç nimezanî