tafî dêweznaw
From the Book:
Dîwanî Bêsaranî
By:
Mustafa Besarani (1643-1702)
1 minutes
1255 views
tafî dêweznaw...
bul’eceb tafen, tafî dêweznaw
perêşan, ’aşiq, dewenden be taw
bê sebir û aram, bê xurd û bê xaw
ne ladê qerar, ce ama û lwan
ne demê sakin, ce deng û dewan
mudam be sed řeng neẍme perdazen
mirwarî ẍełtan pey nisar sazen
nenîşo leḧzey nedaro direng
muẍenî newaz be sed hezar řeng
min mudam ḧeyran ce peşêw ḧałîş
ce bê xawî û şewq, ce la’ubałîş
persam er hey taf dêweznaw mekan
ce şêwey dêwan gêrtenit nîşan!
da’îma sersam ’aşiq şêwenî
ce ’îşqî kêyen bey tewr lêwenî?
watiş hey ebleh, kem famî serşêt
goş dere penem ta bwaçûn pêt
ey soz û sewda, ey bê qerarî
ey çerx û qise, ey bê mudarî
ey gewher paşî û ey duř efşanî
mirwarî sazî û niqêm nîşanî
ce şewqî anen, minîş kerd peyda
her ce ’eşqî wêş şêtim kerd şeyda
bey gişt şêwewe bê qeranenan
pey nisarî ew minet barenan
her kes cey dinya ’aşiq sadiq bo
serbaz wêney baz, dił mwafq bo