qîblem tom ne dił
From the Book:
Dîwanî Mewlewî
By:
Mawlawi Tawagozi (1806-1882)
2 minutes
1673 views
qîblem tom ne dił ...
ta řoy qyamet her tom ha ne dił
fîday şêwet bam cemîn peřey guł
dił ce tasey to daym mido çił
matim wêney seng, zerdim çun xezan
daym pêç midew çun maran gezan
gestey mar xasen satê dû saten
er nemro zîndey řûy ser bisaten
ema min derdim çun derdedaran
daym her we son çun gestey maran
ce hîcranî to her sat mergimen
qetre qetrey zûx ne řûy cergimen
kaşkî her řo yek sya marê
herdû pam megest çend car nek carê
ser minyam we say giłkoy tazewe
çenî ḧesretan bê’endazewe
nek bey tewr dîdem merdey zînde řeng
her satê sed car ser midom we seng
peşêw û melûl îman herdenan
rwê ta sed car pey to merdenan
fîday wefat bam ya wefat nîyen
ya xud bedkaran manî’it bîyen
qîblem to xuda û gişt peyẍemeran
eger meylit hen wêney diłberan
bikyane perêm gahê peyamê
binwîse we lam du’a û selamê
ba wes binîşû mat û peşêw ḧał
ba wes bikêşû henasanî kał
pey çêş bêmeylît kerden we pîşe
gahê toyç pey min ahê bikêşe
baqî wesselam, qîbley mîḧrabim
biłêseş berzen cergî kebabim