dûr û nizîk

her êste lêrewe berew jûr bał egirim
ew hewre řîş loke, manduwe, řa’egirim
pêy ełêm: bibûre çawekem! to namey
baranê yan befrê yan bonî êwaranî ẍemnakî
şarekey (bêkes)t pê nîye?. bimdeytê û
lebatî ew erkeyş
sed maçî peřu bał sutawî
ẍerîbê, wergirî!
her êste lêrewe, min ebme, bapûske û
egeme ew mangî ser kele û
pêy ełêm: bibûre gyanekem! to şî’rî çawřeş û
xermaney tenyayî kiçêkit pê nîye?
řaspêr, legeł xot
bo minit hênabê û
lebatî mijdaneyş
sed gułî kujrawî
dûçawim wergirî!
her’êste xom ekem, be masî bałdar û
ew askî şepoley pêşewe řa’egirim
pêy ełêm: gyanekem bibûre!.. to legeł henasey pirjeta
to legeł zayełe û giryanî hajeta
le çomî çirîkey (dîlan) û
řûbarî şîwenî daykanî şarekem
dwa nałe û kiřûzey
beharî xwênawîy em kurdet pê nîye
bimdeytê û
lebrî ew erkeyş
her’êste: hezar ax
hezar of
hezar dax
le řoḧî bêzarî, şa’îrê
wergirî!