bawkî şehîdim
From the Book:
Tirîfey Heɫbest
By:
Sherko Bekas (1940-2013)
5 minutes
2048 views
1
babe! tasey bînînewe, bo to peroş bû
aramî dił, lenaw yada win û xamoş bû
çaweřwanî, zyatir xemî toy bo ehênam
bizey xoşî, lêm torabû, ne’ehate lam
pepûley xem, leser peřey diłî jakawim
qetîs mabû, wek firmêskî bêdengî çawim
lew řojewe, ke to çekit kirdibuwe şanit
çekî tołey, řêy serberzî bo nîştimanit
lew řojewe, îtir minîş biřam le geşe
ew geşeyey, ke bawkêtîy wa le baweşe!
bełam babe, emzanî boç wêłî kêwanî
leber çîye? ke awarey xoşîy jyanî!
êsteş bîrme, ew şewaney ke da’enîştîn
heta direng, wenewz çawî bexew egirtîn!
pêt ewtîn: min xułqawim bo nîştimanim
şanazîye lew řêyeda bextî kem gyanim
êsteş bîrme ke řûy demit le daykim kird
ke pêt ewt: min minałim goş ekem bo kurd!
her ewsake, min emzanî ke wa nîştiman
lenaw gyanta, lenaw bîrta, ejî ta neman
babe katê, řoştît mał’awayît kird lêman
hergîz yadî, a ew şewe naçê le bîrman
hemuman bûyn, wirdîlekan be serincî çaw
řûy pirsyarî, bê qiseyan, le diła cêmaw
ne’efamîn, ke toy bawkyan leser řoştinî
bo ew şwêney, ke amadey xo tya kuştinî.
êsteş bîrme, destit hêna beser sermana
betasewe, maçî dwayît kird legełmana
înca witit: korpelekan, řołekanî min
gerçî pestim, cêtan dêłim, bełam wa dujmin
hatote ser cê nizirgey nîştîmanekem
bêşermîye, boy necengim, le tirsa řakem!
2
ey babe gyan, paş řoştinit tasey bîrkirdin
hemûmanî, hênaye ser bo lay toy birdin:
bełam tirs le dagîrker le dewrî şara
ew awatey kip kirdewe le gyanî tara.
carcar namet, tarîkarîy la eda ledił
xemî derûn, etwayewe bo beharî guł.
şiney wişey namekanit, fênkayîy hîway:
eda be gyan, lew dûrewe ke serbest edway.
namet biřa, dîsanewe payîzî piř xem
řûy kirdewe, jyanekey xêzanî matem
bebê aram, kewtînewe deryay diłtengî
hezar pirsyar, leşwên encam bo to ecengî
hewałekan, peře jakaw, sîs û werîbûn
melî xozgey newbeharyan leser terîbûn!
le dwacara, be’encamî hewał geyştîn
ew hewałey, firmêskî zor şewî pê řiştîn!
babe! tase û sozî germuguřî caranit:
ewey mabê yadgare wek namekanit.
serincî yad, le řaburdû mayey jyanme
bîrewerîy, tiruskayîy êstey gyanme!
xeyałî to, hetakû bê zortir emdiwênê
bew daxewe, bew yadewe, şewan emniwênê.
ey babe gyan, herçend jyan weha naxoş bê
ke şew û řoj, em azarey êmey le koş bê
bełam madam, mirdineket cêy şanazîye
bo em xake, bo nîştiman, bo serberzîye!
madam xwênit, řijane ser sengerî namûs
bûy be momê ke bisûtêy bo řêy çarenûs
bo ew řêyey, ke karwanî şebeqî awat
mijdey řojî serfirazî bem kurde bidat!
madam mirdî bo ewey gel bijî û serbest bê
nîştimanit serbexo bê, newek jêrdest bê
şanazîme to bawkimî şehîdî kurdî
bo baweřî kurdayetî, be merdî mirdî!
3
herçend jyan, wa şewezeng, tarîk û řeş bê
le pirşingî xorî řûnak weha bêbeş bê
herçend xewî nesrewtinim dûrudrêj bê
hewrazî xem zor le êstem sextitir û lêj bê
bełam madam, lawî merdî em nîştimane
qałbûy bîrî şořişgêřîy tifeng le şane
řapeřîwe, yekgirtuwe, gyan leser deste
cengawere, diłnetirse, xawenî heste
madam xwênî la herzane, bo řêy serbestî
ser şoř naka bo jyanî dîlî û jêrdestî
hergîz namrê, her egate řojî azadî
destî hîway, ekate mil beharî şadî
ey babe gyan, min diłnyam lewey sibeynê
ke em kurde, tołey zorî wek to esênê
min diłnyam şewezengî emşew namênê
tîşkî xorî řojî řûnak çaw heł’ehênê
min diłnyam, kot û zincîr her epçiřênîn
qełay řeşî ejdehakî, her eřuxênîn.
min diłnyam wirdîlekan řeşuřûtî kurd
ewey zordar le baweşî dayk û bawkî kird
sibey poşten wek firîştey şadî, sipî û cwan
têrutesel goranîy xoş ełên bo jyan
min diłnyam ke her ebê şewman beser çê
gel dujminî dagîrkerî bixate jêr pê
ewsa babe, řûsûrî her bo şehîdane
bo karwanî serbexoyîy řêy têkoşane
babe cêget to naw diłe, nek gořî tenge
nawit nexşî, tomarêke ke be xwên řenge
to hawřêy ew gyananey ke hergîz namirin
hezaran sał bêt û biřwa, gerdî kon nagirin
to hełgirî ew meşxełey ke merdayetî
hełîgîrsan bo baweřî řêy kurdayetî
to neberdî, to ew kesey ke dagîrkeran
hatne serit be top û tank, be bombabaran
becêtnehêşt sengereket hełyannekenît
legeł mirdin destewyexe merdane cengît
desa babe pêłûy çawî nûstinit lêk nê
neteweket řûsûrane nawit ehênê
pişt ledway pişt be řoşnayîy baweřî êwe
newey taze bew gyanewe eçê beřêwe!