nûrî şa’îrî xem
selam le gwêgrî hestyar û bîstyarî hunernasî bernamey tapo.
le seretay bernamey tapoda řamangeyand ke em bername cige lemey wełamî pirsyare wêjeyîyekantan edatewe, amadeye bo ewe şî’ir û nesrekanîştan le bernamekeda binûsê û benawî xotanewe biławî katewe. lem bernameyeda parçe şî’rêktan pêşkeş ekeyn le şwênewarekanî kak miḧemmedî nûrî. kak miḧemmedî nûrî bedaxewe kem kare û çewtî jyan mawey nada zortir behunerekeyewe xerîk bê; eger wa nebwaye ême êste bînerî dîwanêkî cwan û řazawey şî’rî ebûyn. kak nûrî herçî şî’rî heye hemûyan hîwa biřawanen. emeş eguncê her le ber jyanî nasaz û nehatî bê. wa der’ekewê ke hergîz tînî humêdêk le diłî kak nûrîya nebûbê, bełam ne min û ne gwêgrekan em delîleman qibuł nîye ke kak nûrî nehatî û çewsanewe û keserî xoy bika be behaney bestinî serçawey zewqî û ême bê beş bika lew awe zułałe. ba emeş biłêm ke em çwar şî’rane bezarawey mukiryanîn û eger wişeyek ya şêwe dwanêk û te’bîrêkî mukiryanîtan têda ber çaw kewt latan seyr nebê.
kak miḧemmedî nûrî ber lewe şî’rekey dest pê bika ełê: şî’rêkî «goran»y- le seremergî hîwada- xwêndotewe û nûsîwyetî: «hemû kes bo mirdûy xoy degrî, bełam giryanî goran bo hîwa û bêkes hemû kesêkî xawen dił bang ekate ser şîwenga. min lew koře germe şîneda bexwêndinewey ew honraweyey mamosta goran bo çend řojêk diłim germ bû. derdî xom le bîr çowe û serim danewand le ber dergay huner. huner ferq naka kurde, ’erebe, ya turk. kone ya taze, «ḧafiz»e ya «lamařtîn», řeşe ya sipî. herçî heye, hî her xełkêke becwanî deçzête gyan û dekşête naw jyan, hem pêkenînî cwane û hem giryanî şikodare. lêreda kak nûrî xoy bekem danawe û enûsê: «min ne nûserêkî zebirim û ne şa’îrêkî ziring. tenha wîstim bezmanî bê zimanî kiřnoşêk berme ber baregay şî’ir û şa’îr û biłêm:
:emin çî biłêm be cwanî,
:řêk û řewan û řûn bê
:wek goranî «goran»y
:hoy aramî derûn bê
:bizey lêw û kizey dił
:însanî bê û yezdanî
:demî tîẍ û peřî guł,
:sêḧrêkî cawîdanî
:«ḧafiz» benîwey şewê,
:besrudêkî ’asmanî
:«goran» beçrîkey kewê
:beqaspeyek goranî
:firiştey bête derkê
:perî bêne hełpeřkê
:zewî biçte semaye
:emin çî biłêm le dwaye?
hunermend besersûřmawî pena ebate ber îlham û epirsê:
:ey hewênî diłî honer
:ey hoy zanist û řûnakî
:le pêş dergat dadenêm ser
:bawêje zeynim be çakî
:çît pêşan da, çît xiste dił
:wa cwan hate derê le kił
:çît lê sitand û çît daye
:wa cwan hênate kaye?
:honer! eto însanî pak
:nimûney baş! řewştî çak
:bo kê degrî? bo kê dejî?
:debye polû, debye řejî?!
:çon sûtawî? çon çoqîwî?
:carê şemî, carê pîwî?
:hełdaysêy bo dinyay řûn
:dademrênî kułî derûn
:to «fîrdewsî» û «wîktor hogo»y
:to lamařtîn, yaxo «xwaco»y
:to «goran»y, estêrey koy
:zeman deřwa, kwa to deřoy?
:dinyay piř awazey to
:watey kon û tazey to
:le her kwê xoy binwênê
:xorî û piřşing depjênê
:honer biłê eto le kwêy
:ne awa bûy, ne ledem swêy
:ne nizîkî ne lêm dûrî
:to biłêsey kogay nûrî
:biroy, çawî, birjangî
:leřûy zerd û reşangî
:xwênî le nêw pêstî sûr
:sipî pêstî wek bilûr
:gyanî le nêw hemuwanî
:řeng û ziman nazanî
:to birûskey yezdanî
:emma kuřî însanî
:honer cêgat dyare
:gencî kuncî wêranêk
:awał û hawřê û yare
:şemêk, şewêk perwanêk
:lew xêzane biçkole
:lew wêrane, lew çole
:cîhanêk exeyte řû
:piř betase û arezû