dîmenî befir û zistan
siruşt lem zistaneda bebergî sipî aw dawênî befir xoy řazandotewe bo her layek eřwanî xêwetî sipî hełdirawe. befir pîte, behreye bo kanyawî mûçe û mezarî cûtyaran, dabînkerî nyazî kiştukałe û le řastîya befir hoy şînayî û şînawerde. kilûy befir katê leser seko û kursî germ le pişt pencerewe seyrî key, řwangew dîmenêkî cwan dexułqênê, bełam kiřêweyek ke ser le řêbwar eşêwênê û tenanet ber pêy xoşî nabînê, natwanê bo ew řêbware, řê hełekirduwe şitêkî baş bê û ew sermaye ke hergîz řûnakate kenarî dewłemendan, belay ew minałe bê berg û řeş û řûtanewe ke le naw małêkî sard û siř û bê tîna jyan ebene ser, natwanê xoş û xoşewîst bê.
bawkêkî hejarî dê nişîn le hemû cîhana cige le kiçołeyek şik naba, kiçołeyekî taze pêgeyştû, hemû awatî ew bawke pîre eweye ke nazdarî kiçî be şûbda û newekanî le baweş girê û biřwanête bizey bê tawananey ser lêwî sûr û naskyan.
zistan hatuwe û kar û kasbî le awayî xewtuwe; dê le jêr pêxefî sipî befirda xerîkî xewî zistane.
herçî dahate le kiştukał hatote dest, îtir katî eweye bawkî pîrîş le dahatî kem û kurtî xêzanekey, endamî şilk û cwanî nazdar ke bergey sermay tûře û leş tezênî zistan nagrê, poşte katewe. bawik eçê bo şar û çawî çaweřwan û cwanî nazdar le řêgaye û hezar awatî řenga û řengî kîjane le diłya şepoł ebestê.
:sê çwar řojêk bebê wiçan
:kilûklû befir ebarê
:hemû wiłat samałsa bû be yegcarî
:asmanî řeş tawêk
:ney’etrûkand çawêk
:befir ebarî... befir ebarî
:bistêk, ejnoyek, nawqedêk, bałapyawêk,
:lem law em lay dêyekewe
:pesa pesa mał eřûxa
:hêlaney hejar eşûxa
:na! na! îtir çi nałêm mał
:gořî giştî jin û minał
:sê çwar řoj bû bawkî nazdar
:çûbû bo şar
:çûbû cilî bo bisênê
:kirasî caw
:sełtey berupiş belaşe
:nazdarî xoy pêy dapoşê řûtî laşe
:êwareyek çen tarmayî
:termêk le koł
:eyanişkand befir û sehoł
:milyan ena bo awayî
:termî kê bû? termî kê bû?
:termî řeq bûy bawkî nazdar
:hey quř beser xełkî hejar
:małêk dařûxaw
:diłêk piř zûxaw
:jinêkî feřtût
:nazdarêkî řût
:bemîrat mabû bo daykî nazdar!
:megrî megrî nazdarî xom
:megrî bese.
:her ême nîn
:xełkî hejar,
:giş bê kese
:megrî! megrî!
:çawekanim bixewî başe.
:firîştey xew
:boy dûrî sełtey belaşe.
zistan tewaw bû, xîwetî sipî befir pêçrayewe, bełam ew zûxawe ke zistan û serma ledłî daykî nazdar û nazdarî xistibû hergîz be hatnî behar û sirwey bonxoş lay gułzar tîmar ne’ekira.
zistan ebřêtewe, paş sermaw sołî leş tirsên, bonî xoşî gułzar ehajête demar tebî’etewe, ewe řê û şwênî dabřiwa û dyarîkirawî jyanî ademîzade. gahê le diłya behare û gahê le derûnya zemherîre, bełam ew diłane wa begermay xoretawî ewîn û hestî new’dostî dageşawin, hergîz besermay zistan û begełařêzanî payz najakên, kam dił ewîndare ew diłe ebête, kwanûy danemirkawî însanîyet. ewîn ya hestî řaspêrî însanî, axo lem zistaneda bê derbest le hodey germa ser enêtewe ser serîn le katêkda ezanê ke dirawsêkeyan tenya bedûkełî henasew biřînî dił germî ebêtewe?! lam wanîye, çunke hêşta katî ewe nehatû, beser termî însanîyeta bigrîn, xozga hemû diłêk řûgeyek ebû û ekira nyazî lê bixiwazî û penay bo berî.
le katêka mebest û watey berzî însanî ekewête naw, xozga gułî însanîyet le beharî emsała lem mezray diłmana çiroy der’ekird.