diłey dił we mey meylî leylê keyl
From the Book:
Dîwanî Mewlewî
By:
Mawlawi Tawagozi (1806-1882)
2 minutes
1350 views
diłey dił we mey meylî leylê keyl
meḧrem we řazan xełwetxaney leyl
lane ḧełqey zułf ’enber boy şew řeng
hamdemî cay teng ełḧedseray seng
perwaney mezar ew awat wastem
tercemey ḧałat peşêwîy cestem
’erz ker we leyla we sed xemewe
çem we nimewe, dił we temewe:
dêwaneket dîm biłêseş berz bî
berzî biłêseş her sat sed terz bî
we her terzê leyl milawnawe
diłey sengî sext mitawnawe
ga goya mewyerd înd mewyerdewe
ga mewat we dem êşî derdewe:
ay ce êşî ten ce gyan cyay min
ay ce lway to û ew şon dyay min
sextî êş derd bedḧałîm layê
way bêto menził gişt xałîm layê
we her menziłda û her řaguzerda
her destî ḧesret mida we serda
çêşen mwînûn menził bêto bo
bêhoşim, xew bo, řas bo, diro bo
ga têkeł mekerd çenî derdî wêş
ferdî hamferdiş çenî ferdî wêş
mwat: fîdaş bam ye cay şîrînen
guzergay ew şox zułf ’enberînen
ce bałay ey seng pa awerdewe
berqey naz ce řûy ew şeng kerdewe
cew casûsgawe, bew xedengewe
dił tilna we zam hezar řengewe
cew serdeştewe guław řêzan kerd
sara boy ’enber sara herzan kerd
çoge celay cam cebhey cemał da
bergeştî we bext bedrî kemał da
çêge ḧuqey řaz şîrîn kerdewe
tamî tałîy derd dûrî berdewe
guzergey cîlwey leyl bêḧed bew terz
zayełey mecnûn ce ’ed řed bew terz
çon kerûn teqdîr pey ser karî to
ne to bijnewî ne dosdarî to
me’dûmPen name çun qeza ama ce nakaw
dana çun nadan wizo we gerdaw
’îrfaneket kon, famit ko şîyen
ay pey cîlwey dos nîhayet nîyen
aro yek cîlweş ha ne řûy karda
ferda çêş ew yek cîlweş dyar da
la, beł ew cîlwey řû ne penhanî
new’e zuhûrên, zanaş wîcdanî
çi matemêwen pat bîyen pêwe
dana û mexşûşî kê dyen pêwe
ew cîlwekerden er şî we taqî
êd cîlwe kerden suraḧî û saqî