qesemname
From the Book:
Kejawey Dil
By:
Naser Aghabira (1968-2020)
2 minutes
437 views
swênd be tirîfey mangî zêwîn
bew hełałaney le kêwîn
be řazî řûbaranî meng
be bałayî serwî şox û şeng
be wenewşey kiz û diłteng
be nałey ney be sozî çeng
be qaspey kewî lapeřan
be awingî banemeřan
swênd be piřşengî çawî kał
be tirîqey bê xewşî mindał
be ewînî las û xezał
be sîngî kunkunî şimşał
be zirîngey defey derwêşan
be taqetî çillekêşan
be řengî zerdî řeşpoşan
be xumarî qedeḧnoşan
be çirîkey berzî dengixoşan
be peymaney meyfiroşan
swênd be wefay konedostan
be şinebay sardî kwêstan
be neş’ey lale bedestan
be çyakanî kurdistan
be girmey meşkey kabanan
be lar û lencey cwanan
be xirmey bazne û mengołan
be narenarî kîjołan
be sêberî małî cîran
be naz û nûzî dezgîran
be řencî kuřanî ladê
bew nameyey le tořa dê
swênd be pepûley řezasûk
be surmey çawî tazebûk
be çirîkey berzî qenarî
be řesmî konî diłdarî
be newrozî wiłatekem
be mêjîne awatekem
be esrînî tikawî şem
be xoşewîstî zîn û mem
be sûre qurîngî dem çoman
be çakeçkołekey xoman
swênd be řencî şan û bazû
be girşey ko û terazû
be gułegezîzey kem temen
be xaşxaşk û be yasemen
be befrawî lend û sehend
be ewînî xec û syamend
be qendîlî ser temawî
be diłanî beso û xemawî
be zerdayî bûmelêłe
be bilwêrî şwane wêłe
be berzayî dundî hełgurd
be layelayey daykî kurd
be xakî pakî nîştiman
be řuḧî berzî giştiman
ewînî tom her le diłe
tasey tom her wa bekułe
her wek bełênîm pêdawî
serî xomim le girêw nawî
her leser qewlî caranim
le řîzey wefadaranim
êstaş her to gułî minî
dagîrkerî diłî minî
awêtey neẍmey sazanî
têkeławî awazanî
dengî diłbizwênî mamlê
çi be qetarç çi be lê lê
katê dełê detperistim
to dexate bîr û hestim
le ewîn etoy mebestim
eger berzim, eger pestim
etoy serçawey hełbestim
nîştimanî xoşewîstim