rixist û mihilit dadin şîru şîrîn ra ta çihil ruz û xud bih şikar riftin
From the Book:
Şîrîn û Xusrew
By:
Khana Qubadi (1704-1778)
2 minutes
379 views
şêro ce watey seru xeraman
ce şermindegî ser wist ne daman
ne daştiş cwab, serş wist ne pêş
şîrîn řuxset da şî ne yagey wêş
şêro şermesar mend ne xecałet
dermanş nebî, zatiş be nalet!
şî ne fikir xam çi řeng bikarûn
çil řojey we’deş çenî buyawun?
awerd ne xatir derdîn dara
hîç xaster nîyen ce seyr sara
werne meḧałen bigêrûn taqet
bê şik mitoqo diłim ce ḧesret
şêro pey seyran senceq winara
daş ne soz saz, kêşaş ne sara
tîpê ẍułaman çenî saz û soz
xeyme û xyaban toşey çihil řoz
ladê ciłewřêz cirît û çewgan
neşim ney bazî ne mewc meydan
ga seyr segan neser dyaran
şikar şahên tîp teyaran
ga seday xoşxiwan neẍmey def û çeng
sazan diłgîr şox xoş aheng
şêro bey destûr ne seyr sara
çil řojey we’dey şîrîn wiyara
horgêra şêro ciłew be şîtab
yawa be menził, hewa da řîkab
be taw û te’cîl pya bî ce zîn
dûbare ce new tełeb kerd şîrîn
xwace serayan cehd û cext kerdin
be taw û te’cîl şîrîn awerdin
yawa be xidmet şêroy bed neseb
ser berd be sucûd, midra be edeb
şêro wat: şîrîn we’de temamen
wadey wextimen, dinya be kamen
henî emrê hen bawerûn be ca
ce îne fêşter çêşten řeza
şîrîn ce derû fikirş berdewe
qapîy xeyałan derûn kerdewe
watiş ce dinya namanûn dirêẍ
xo dimay xusrew wêm bidewn be têẍ
ba da dimay wêm şêroy bed endêş
mîrat xusrew nemano perêş
be firîb û fen karê pêş kerûn
esasey xusrew ce destiş berûn
wextê esasiş berkerdim ce mişt
ewsa cewdima wêm bidewn we kuşt
werne çi ḧasił wêm bidewn we bad
şêro demay min binîşo be şad?
şewq û şadîş bo be řoj û be şew
be mał mendey mîrat xusrew
bes min ce dinya çêşim meqamen
îne min kerdim, kirdarim kamen