cwab dadin xisru şîrîn ra bih labih
From the Book:
Şîrîn û Xusrew
By:
Khana Qubadi (1704-1778)
2 minutes
450 views
xusrew wat ce no: erê dilaram
ḧerf serd wesen pêm nemend aram
meker to ḧîsab şox û şengîy wêt
bizurgî û temkîn sam û sengîy wêt
şêwet şîrînen, şahan peseden
xurşîd ce ḧusinit sermeşqê senden
er řûy wêt ne cam bwînî we çem
şêt mûy û sersam, ’umirit mibo kem
er řwê ne cam bwînî řûy wêt
şêt mibî dersat, çun min meyo pêt
îḧtyac nîyen wêt kerî te’rîf
zerîfî, nîyen wêney to zerîf
lał ce bedexşan ser mido be seng
nîyen wêney lał lebanit xos řeng
qend er dehanit bwîno ne xaw
dersat dehanş piř mibo ce aw
şoxîy şêwey to ḧeq şerîf kerden
şîrînît, şîrîn, ce şeker berden
er bûreşî to be çun min şayê
ce destey bo muşk zułfanit tayê
bîlla mistanûş be her hefit kîşwer
be hezar xerwar ’ebîr û ’enber
dîdey bed dûr bo ce şoxîy şêwet
ce lûl zułfan lûlyay lêwet
dił serşam ce cam cur’ey badey ton
qend qendehar ẍułamzadey ton
tûba ce beheşt ser’efgendey ton
sunbul bendey zułf şemał şendey ton
çun bey tewr ne dewr nexşibend nexşan
şêwey şîrînî gişt be to bexşan
sa wes be ’ebes şox leb şeker
çun sirkey nařes lêm tirş û tał ber
er řasen pey min bey tewr wêłenî
pey min sergerdan era gêłenî
derûnim wey tewr be zuxał meker
şîrînîy dinyam, şîrîn, tał meker
sewgendim be ’etir muşkîn xamey to
be xał lîmoy bo şemamey to
ya mibo bidey ce wesiłit wayem
bikerî say çetir zułifit be sayem
ya mibo çêge her we dest wêt
biřêzî hûnim, nînen watim pêt
er nebyam merdey zułf girinicit
daxdar nuxtey xał pay zinicit
pey çêş yend ce to minałamewe
yend be şahîy wêm milałamewe
to biker derman zam sext min
taluxiş be ton tac û text min
pey to nîşten bar sya ce lêwim
řeḧmê ker be ḧał cestey peşêwim
îmşew řuxset der şîrîn çenî hem
buyarmê be şad ta we subiḧ dem
axir şermê ker cey ḧał nezanî
cefa xas nîyen ewend binmanî