riftin şîrîn bih bîstun bih difin kirdin firhad
From the Book:
Şîrîn û Xusrew
By:
Khana Qubadi (1704-1778)
2 minutes
470 views
bey tewr kerd «xanaPen name» ey neqşe bunyad
çe ’eşq şîrîn pey fewt ferhad
her cew wexteda xor mibî awa
ey bed hewałe be şîrîn yawa
ew şew xo şew bî ta be şebeq zerd
ew şox pey ferhad şîn û zarî kerd
sa çun şew şeq bî be têẍ aftaw
horêza şîrîn şew nekerde xaw
çenî çend esbab ce ḧîsab efzûn
qedem berd we pay seng bêstûn
sa ke dîş ferhad derûn mewc hûn
wêney seru ney keften sernîgûn
pya bî ce esp ew şay diłnewaz
serş girt we ban ziřanî be naz
watiş: ẍerîben, cergiş kebaben
bikermêş şîwen xeylê sewaben
aferîn şîrîn şox bê endêş
ew řo ce řay şerit adab danîy wêş
deste zułf lûl şî kerd pey şînş
benaxûn horkend xał cemînş
ḧełqey kemendan ce hûn kerdewe
be esrîn surmey dîdeş berdewe
bew tewr çun ẍunçey çak wist ne cameş
zahîr bî nuxtey xał şemameş
wistiş ne řûy xak ’ereq çîn zeř
ce laley nergis kerdiş daman peř
ke şîrîn ferhad milawnawe
dił er ce seng bî mitawnawe
ewend zarî kerd ce endoy derûn
xuroş kerd ne seng qulley bêstûn
ne pay bêstûn yend řêza sêław
girt gêc mewciş seng pay peřaw
aḧir ew guł bûm guł boy guł endam
wextê bey destûr şînş kerd temam
ferma be destûr şahan çînş
be dêbay bo muşk kerdin tekfînş
be ’îzzet ne’şiş be xak siperdin
fermaş mî’marê teř dest awerdin
’alî gunbedê řengîn perê ew
te’mîr kerd xaster ce mişkoy xusrew
definş kerd şîrîn bey terz û tewirş
hezretî gułan nya ne dewirş
cewdima xêza be cerg buryan
şî be qesir wêş be dîdey giryan
axir ey hewał yawa be xusrew
ferhad koken cey dinya keç řew
be tarac birya genc sermayeş
sey seng ełḧed bî beser sayeş