sidir micils dir adabdanî gwîd
From the Book:
Şîrîn û Xusrew
By:
Khana Qubadi (1704-1778)
2 minutes
246 views
xusrew ce dimay ey suxenxiwanî
wêney deryay jerf gewher fişanî
be lefiz fesîḧ şîrînter ce qend
perê bizurgan bezim diłpesend
çend nuktey şerîf şox diłpezîr
be duřiř kelam bey tewr kerd teqrîr
watiş: her şexsê saḧêb şi’ûren
me’lûm ce adab nadanî dûren
çun zumrey be’zê bedcîns bê pîr
neşmara erbab derwêş be feqîr
pey çêş? ne řûy dewr dinyay bê endêş
muḧteşem terê nyen ce derwêş
herkes ce bedîy merdan nêk zat
zuban beste nîşt ne řûy ka’înat
ewkes sitareş se’d ekberen
berguzîdey zat danay daweren
dûren ce řay dîn řewyey kafrî
to be ’eyb wêt hîç řa neberî
bełê herdem ’eyb merdum bişmarî
’eyb wêt ve xełq penhan bidarî
emanet ferzen er henit şu’ûr
be xurdîy duşmen hîç meber meẍrûr
mikero ’aciz be danay dawer
peşşeyê sed pîl ejdeha peyker
hîçkes cey dinyay aşfitey piřşor
daman dewłet negirten be zor
dewłet ne be zor ne be kirdaren
dewłet her be dad perwerdigaren
řazyen pey wêş geday parseger
bibo çun şahan be saḧêb efser
bełê her serê yaran serwer
nyen ne řûy dewr şaystey efser
behram çopîn be cennet bo şad
min xusrew bîm hem xusrew nejad
ta be řoy ew gyan be ḧeq siperd
her ce min de’way xusrewî mikerd
çun ferqiş nebî sizay tac û text
axir berdiş çerx ne dinya şinext
bizurgan cey we’iz şîrîn xusrew
kerdişan zarîbe řo ta be şew
xusrewîç ce řay bizurgî ew řo
werdiş pey behram te’essuf bê şo
te’zyetiş girt ew şay cem meqam
sê şebane řoz pey fewt behram
cewdima xêza meclîs taze kerd
muẍenî çengiş piř awaze kerd
ewend bexşa genc dêbay guł ce zeř
sara û serzemîn temam bî peř
cewdima dîsan hîcran şîrîn
dûdî derd dax ew zułf ’ebîrîn
giřey ayrê westiş ne derûn
piřşing şołeş wiyerd ne gerdûn
pey řefi’ xumar koy xeraman derd
«barbud» çenî saziş tełeb kerd