miqalat xisru ba şîrîn dir xîmh û tilb wisal nimudin û cwab şîrîn
From the Book:
Şîrîn û Xusrew
By:
Khana Qubadi (1704-1778)
3 minutes
497 views
gułçîn gułzar ey baxçey řengîn
bey tewr best destey řêḧan mîşkîn
şewê ce şewan weşboy weharî
hewaş mida boy mîşk tatarî
qurs mang ce çerx sewz piř exter
midrewşa xaster ce şems xawer
ey şew xergay xas xusrew be taqî
mibexşa zînet beheşt baqî
ce ’ekis řuxsar saqîy sîm endam
ce řeşḧey şerab saqîy zeřrîn cam
ce sewday şîrîn wenewşe xałan
ce lencey řendan nazk newhałan
ẍunçey xatran çun guł mişkawa
dił er seng mibî çun qend mitawa
semen bo sewłan daney duř ne goş
’enberîn zułfan dêbay zeřbafit poş
çun zuhrey řeqqas çenî çeng û def
nîştebên ne dewr xergey şa be sef
şemayl çenî şemame nesîm
mikerdin tefsîr mentûqey qedîm
çun her şew şanaz şadî mijendin
tesnîfat şî’ir şîrîn mwendin
sa wextê ce cam bade bîn sermest
ce řeqis û ce saz kota kerdin dest
ce hucûm cam be bê perwayê
mestane keftin her yek ne cayê
axir ew xergey şox ’ebîrîn
her mend be wicûd xusrew û şîrîn
xusrew cew demda ce sewday şîrîn
ce ’eşq şêwey ew zułf ’enberîn
zeřře ce diłda aramş nemend
çun çaşney barût mwatit giř send
arezûy bałaş ce ser berd famş
ce taqet bî taq, biřya aramş
bê perwa xêza ew şay cem şikû
girt destey zułfiş be sed arezû
çun destey nergis ce new şikawa
bo nya ne boş herta ke tawa
wat oxey şîrîn biřya awatim
henî ta zîndem gyan be fîdatim
bełê fîdat bam leyl leb şeker
bo ce derḧeqim namerdî meker
xo lêt me’lûmen min ce newey kêm
sa çêş bî pey to bey tewr ama pêm
er saḧêb şertî şîrîn wêł tom
bey tewr mwînî ara gêl tom
şêt û şeyday ’eşq şoxî û řendîy tom
wêney muqessîr şahan bendîy tom
bê demax ce zam qews ebroy tom
ẍaret burdey xał şox şeř coy tom
çun bey tewr siftey dax ’eşq tom
meynetîy dił řêş meyney meşq tom
sa bîm be nezirit zułfan ’enberbo
îmşew kes nyen ẍeyr ce min û to
ba peştanit bûn yek satê îmşew
pêm der ce genicit zekatê îmşew
çun ce sewday to to ẍem be gom îmşew
meger ce lay wêt řenceřom îmşew
cergim ce daxt kebaben îmşew
derdim dewaker ewaben îmşew
be sergerdit bam sewł sîm endam
pey bejin bałat ’umirim bî temam