kişîdin şapur surit ra nubit dum
From the Book:
Şîrîn û Xusrew
By:
Khana Qubadi (1704-1778)
2 minutes
351 views
çun ce şułey nûr xurşîd guł řeng
direxşan çun lał ce serkawan seng
şapûr neqaş hem kêşa be dew
tîmsal şîrîn diłřobay xusrew
awêzanş kerd dîsan be cextê
ne ser şax sewz berze dirextê
yaran şîrîn bêdar bîn ce xaw
nim daşan destey zułfan be guław
nîştin be sed ’eyş çun keyan key
be řeẍbet kerdin meyl cam mey
sermest bîn ce cam badey şîrazî
baz kerdin şiru’ be çopî bazî
dił ḧeyran mibî ce endazşan
şeker mibêza řêzey řazşan
tûtîy şekerřêz şay şeker şêwe
şîrîn şeş dang zułf lûl lêwe
ce gerdiş ’eyn ahûy xuten bêz
dîş hem ew sûret kiryan serawêz
her wext bî ce bax beden be bê naz
tawis řoḧiş bikero perwaz
dîsan şîrîn dî ew sûret bende
ew teswîr şox şîrîn û řende
wat be xał xasan ye çi fendêwen
ye çi sîḧir sext sûret bendêwen
şeş dang şoxî, zułf bo ’enberîn
xêza ew sûret bê ’eyb şîrîn
ne dîdey şîrîn saḧêb tac û text
be sed ḧîle û mekir penhan kerd be cext
ama û ’erziş kerd ew nemam no
watiş fîdat bam şay firîşte xo
ew sûret bende deskar dêwen
xiraben, sîḧren, insan firêwen
herkes bwînoş mibo dêwane
bedter ce mecnûn řîsway zemane
şîrîn êd şineft hem gał da be dew
xeymey xusrewî bar kerdin be şew
çun ahûy mîşkîn perwerdey xuten
řûş kerd ne saray şîrîn ermen
şew çoge çenî yaran diłber
noşa badey mey ta be sub seḧer