bab 25
1) ew wextî padşayetî asman deşubhê be de bîkiran ke çirayanî xoyan hełgirt û weder kewtin ke be pîrewey zaway biçin.
2) beła pênc le wan nezan bûn û pênc ’aqił.
3) çunke ew nezanane çirayanyan hełgirt beła řonyan degeł xoyan hełnegirt.
4) beła ew ’aqłane řonyan de qapanda degeł çirayanî xoyan hełgirt.
5) beła wextêkî zawa direngî kird xewî hemûyan hat û nûstin.
6) beła de nîweşewêda qîjandinêkî bû, eweta zawa, weder bikewn ke be pîrewey biçin.
7) ew wextî hemû ew bîkirane hełistan û çirayanî xoyan ḧazir kird.
8) û nezanan be ’aqłanyan gut: «le řonî engo be me biden, çunke çirayanî me dekujênewe.»
9) beła ew ’aqłane cwabyan da deyangut: «nabê, bo me û bo engo qet beşê naka, çatre ke biçne kin ewaney ke defroşin û bo xotan bikiřn.»
10) beła wextêkî ewan deçûn ke bikiřn zawa hat û ewaney ke ḧazir bûn degeł ewî de dawetêda wejûr kewtin û derke daxra.
11) û le paşan ew bîkiraney dîkeş hatin, deyangut: «ya řeb bo me bîkewe.»
12) beła ew cwabî da û kutî: «řastî be engo dełêm: engo nanasim.»
13) dena be xeber bin çunke ew řoje û ew se’ate nazanin.
14) çunke wekû pyawêkîye ke seferî dekird û ’ebdanî xoy bang kird û małî xoy be wan espard.
15) be yekêk pênc qentar, be yekêkî dîke dû û be yekêkî dîke yekî da, be her yek wekû quwetî xoy û cê becê seferî kird.
16) ewey ke pênc qentarî wergirtibû çû û sûdî be ewane kird û pêncî dîkey qazanc kird.
17) her waş ewey ke dûy wergirtibû dûy dîkey qazanc kird.
18) beła ewey ke yekî wergirtibû çû û erzî hełkend û dirawî aẍay xoy şardewe.
19) beła le paş wextêkî zor aẍay ew ’ebdane hat û degeł ewanî ḧîsab kird.
20) ewey ke pênc qentarî wergirtibû hate pêşê û pênc qentarî dîkey hêna, deygut: «ey aẍa pênc qentarit be min espard, eweta pênc qentarî dîkem qazanc kirduwe.»
21) aẍay wî be wî gut: «aferîn ey ’ebdî çak û emîn, leser çitanî kem emîn bûy, eto leser çitanî zor dadenêm, wejûr xoşîy aẍay xot bikewe.»
22) ewîş ke dû qentarî wergirtibû hate pêşê û kutî: «ey aẍa dû qentarit be min espard, eweta dû qentarî dîkem qazanc kirduwe.»
23) aẍay wî be wî gut: «aferîn ey ’ebdî çak û emîn, leser çitanî kem emîn bûy eto leser çitanî zor dadenêm, wejûr xoşîy aẍay xot bikewe.»
24) û ewîş ke yek qentarî wergirtibû hate pêşê û kutî: «ey aẍa etom nasî ke pyawêkî tundî, ke le cêyekî ke netçanduwe deçnî û le cêyekî ke biławit nekirduwe xiř dekeyewe.
25) û ke tirsam çûm û qentarî tom de erzêda şardewe, eweta małî xot.»
26) beła aẍay wî cwabî da û be wî gut: «ey ’ebdî xirap û tembeł, detzanî ke le cêyekî ke nemçanduwe deçnim û le cêyekî ke biławim nekirduwe xiř dekemewe.
27) dena bo to lazim bû ke dirawî min lekin seřřafan dabnêy û emin wextêkî hatim î xomim degeł sutî wergirtibaye.
28) dena qentarî le wî bistênin û biden be wey ke de qentarî heye.
29) çunke ewey ke heyetî be wî dedrê û zyad dekirê, beła ewey ke nîyetî ewey ke heşyetî lêy destêndirê.
30) û ew ’ebdey bê fayde bawêjne tarîkayî derê, lewê giryan û çiřandinî dedanan debê.»
31) beła wextêkî kuřî însanî de celalî xoyda bê û hemû melayketan degeł ewî, ew wextî leser textî celalî xoy řodenîşê.
32) û hemû mîlletan le ḧuzûrî wî xiř debnewe û ewan le yektirî cwê dekatewe çilonêkî şwan, meřan le biznan cwê dekatewe.
33) û meřan le lay řastî xoy dadenê, beła biznan le lay çepî.
34) ew wextî padşa be wan le lay řastî xoy dełê: «werin ey membarekanî babî min, û ew padşayetî ke bo engo ḧazir kirawe le hewełî dinyayê be mîrat bigirin.
35) çunke birsî bûm û xwardinû be min da, tînû bûm û xwardinewew be min da, bêgane bûm û emnû qebuł kird.
36) řût bûm û deber emnû kird, nexoş bûm û serû le min da, de bendîxaneyda bûm û engo hatne kin emin.»
37) ew wextî sadqan cwab be wî deden û dełên: «ey řeb kengê etoman birsî dî û xwardinman be to da, yan yan tînû û xwardineweman be to da?
38) û kengê etoman bêgane dî û etoman qebûł kird, yan řût û deber etoman kird?
39) û kengê etoman nexoş dî, yan de bendîxaneyda û hatîne kin etu?»
40) û padşa cwab deda û be wan dełê: «řastî be engo dełêm: her çî ke be yekêk lew birayaney çikoletrî minû kirduwe, be minû kirduwe.»
41) ew wextî be ewanîş le lay çepî dełê: «le min dûr bin ey mel’ûnan, de awrî ebedîda ke bo şeytan û melayketanî wî ḧazir kirawe.
42) çunke birsî bûm û xwardinû be min neda, tînû bûm û xwardinewew be min neda.
43) bêgane bûm û emnû qebuł nekird, řût bûm û deber emnû nekird, nexoş bûm û de bendîxaneyda û serû le min neda.»
44) ew wextî ewanîş cwab be wî deden û dełên: «ey řeb, kengê etoman birsî dî yan tînû yan de bendîxaneyda û xizmetman be to nekird?»
45) ew wextî cwab be wan deda û dełê: «řastî be engo dełêm: her çî ke be yekêk lew çikolanew nekirduwe, be minîşû nekirduwe.»
46) û ewane deçne ’azabî ebedî, beła sadqan bo jyanî ebedî.