giftar dir anhar û xîmegahiş û kirsî
From the Book:
Komele Şîrî Feqê Qadirî Hemewend
By:
Faqe ghader hamawand (1830-1890)
2 minutes
446 views
ḧewş her sera daro çehar co
ne her co yek ḧewz muheyyan her so
ne bałay her ḧewz xeymey řengařeng
cumle muresse’ daney giran seng
her xeyme kursî û ferşiş muheyyan
mezac kasiş kafûrî hewan
ewweł engebîn, dîger co ne şîr
te’me û lewnşan nimebo teẍîyr
sîyemş kewser badey şeraben
nehir çeharem zîlal aben
îzhar qudret zat celîlen
çeşmey her çehar ne selsebîlen
new’ xeymegaş surx û sebiz û zerd
jengarî û ebyez, dêz û lacîwerd
wey tewren tertîb bizurgîy xyam
her xeyme daro çend ḧucre û meqam
be duřiř û mercan kul muneqqeşen
cumle arastey kursî û mefreşen
da’îrey xeyme nexil û şimşaden
řumman û ’enab, seru azaden
narinc û lîmo, ’er’er, mureqqem
ce enwa’ guł ḧewşiş mucessem
kursîy her ḧucreş mîsk ya ’enberen
ya kehreb řiştey duřiř û gewheren
be’zêşan ’ac û be’zê ce ’ûden
cumle mucewher daney meqsûden
be’zêşan yusir û be’zê ce mahî
be’zêşan nercîl ’etay îlahî
be’zêşan ce le’il, be’zê ełmasen
ḧucrey her qesirş bey tewr qyasen
new’ her ḧucreş ne îxtîlafen
ferş her utaq kul ḧerîr bafen