evînî min azadî
benawî xwa, benawî gelî qaremanî kurd, be yadî qaremananî kurd
From the Book:
Karwanî Xeyal
By:
Hedi (1927-2016)
3 minutes
572 views
hîway çwar werzim were azîzê
tasey beharim, xemî payîzê
yar kołêm, gerdin kêlê, ḧeyranê
ho şem, ho şîrîn, ho gułe cwanê
bestey azîzey ’ezîzanî dûr
gencîney kontir le kelde û aşûr
were bom biłê be dengêkî xoş
were minyan kuşt pejare û peroş
bendî payîzey payîzan direng
gełařêzanî êwarey kemřeng
xokokirdinewey zerdey řeng peřîw
baze beraney hetaw bo nedîw
were bom biłê, ewřo her ewřo
serî min germ û girawî namo
swaroy betenêy hîwayey lawan
geloy usturey ferhengî bawan
were bom biłê û çiş ke le xemê
wek şemzîn bendim bo bawê şemê
were be çirîkey berzî mem û zîn
paraw ke mêşkî wîşk û bê evîn
diłî min yek û xemim hezare
taze le asom zerdêk dyare
ay le derdî min, ay le destî to
ey hawar le dest çawî mestî to
řûmet gułî sûr nařeza kirdû
bisk birewî beřeza birdû
temaşay henyet hetaw nekirde
bonî egrîcet şemał nebirde
lew hemû wêney westay wêneger
her toy bê wêne lê hatûye der
ew katey hêłî be birot dadêna
her zanistê bûy bekarî hêna
ta zerdegułî gonat dengêwê
çîmen sed kase xunaw depêwê
bo ser gerdî to gyanî min dewrî
kemtir nedîwe le desrey hewrî
ne xirmey bermor, ne semay pereng
ne qiłpey badey tungey gerûteng
hîçyan wek bizey ser lêwêkî ał
ser naşêwênin le min û le xeyał
perî û zêřnokê yekin be şêwe
xałêk parsengî xiste ew nêwe
daney xał sûta leser şemî řû
ne şem damirka, ne ew diłmend bû
eger xem dênê fêsî lar kewtût
xew deba xałî agir têberbût
xał û lêwî to lêk dên be nore
xał lecêy xoy bê qîmetî zore
ke xałit xizî û řûy kirde lêwit
xwên peřye kułmey xeyał bizêwit
şîrnayî lêwit xałî wa miř kird
xałit nuxtêke dinyay pê piř kird
we řêy kes neyen xał û biskî xaw
mel bo dane dê xoy dawête daw
gware wa legeł lacangit saza
taze karî min le kar tiraza
kemtir bew şane kezîk dabêne
yekcar hêndeş řû mede awêne
diłnyam hîçyan qise hełgir nîn
şaney be ziman û awêney řû bîn
dêwî dizêwî karêkî kird pêm
sirûşt pêy seyre le cwanî edwêm
were řabirdû lebîr berewe
ewcar koyley xot beser kerewe
were ba biřon řojanî tałî
derdî jêrdestî dewrey ’ewdałî
dembînî ewřo mestêkî mestim
were ca destê bixe naw destim
beynî min û to hełgîra perjîn
katî ewe hat destew esto bîn
çend serî berzim hawîşte ber pêt?
sêławî xwênim çend řişte ser řêt?
çendit bend û daw be min řewa dî?
axir to nawit nira azadî?