řojê ce řojan ne şwên hewarê
From the Book:
Dîwanî Mîne Caf
By:
Mine Jaff (1911-1965)
2 minutes
517 views
řojê ce řojan ne şwên hewarê
dîm keften we xak taqyeteyarê
watim ey taqyey sya perçeman
teqîm cemîn şuxî sêw meman
waçe to î’caz zatî pêẍember
mişkînî we boyî muşkî kam dulber
sêwanî perçem kam nazenînî
koney kiławzeř kam meh cebînî
we pişt serew lagîrey şîrîn
kam şox toy kerde taqyey zêrîn
hate e zwan taqyey bêçare
wey tewr da cwaw lew şwên heware
watiş pirsyarê ey taqyey teyar
mişkîn boy we boy muşkî kam nazar
kiławzeř ne ser newnemamê bûm
şoxî syaçem guł endamê bûm
ahûy xuten bo bała ’er’erê
qamet zeřistûn nazk dulberê
sergonaş çêman peřey tazey guł
seḧer be pişko we neway bułbuł
dîdeş we surmey qudret řeştebê
diłdaran we daẍ bałaş kuştebê
tuřey tuẍrayî çîn sya pirçişen
sêwanî serxał naw sînew memşen
tirfey sifîdey çałî tîn bêgerd
çun awî ḧeyat ce toş mewc mewerd
nazar newhałê mişkîn ḧuqey naf
ser delîley gel nazaranî caf
carcar êwaran we naz megêła
kerdewe ’ewdał çî bî ce xêła
namim kerdebêt we taqyey feřeng
îsteyş mewînî keftenim wey řeng