yaran min dîsan newbey zarîmen
From the Book:
Dîwanî Mîne Caf
By:
Mine Jaff (1911-1965)
2 minutes
428 views
yaran min dîsan newbey zarîmen
newbey êş sext dił ewgarîmen
newbey zayeley diłey mar gezten
bawkeřoy we germ erwakey xesten
dîsan min řořoy dumay xêłmen
waweylay dumay koçî leylmen
maçan yaney caf we çatoł byen
kosaran řengîn gułan berşyen
ye gişt nîşaney lway cafanen
wadey sefa û seyr çem kiłafanen
nazaran meylî seyranşanen
heway seyrangey kwêstanşanen
wadey timaşay ser kosaranen
katî sefa û seyr çem xumaranen
gułan gişt řengîn bûlbulan diłşad
nałey qumrîyan xem medo we yad
çirîke û qaspey kew ne pay kawan
şaxe û birîqe û hajey şetawan
tewq tewq gułałan nergisan pol pol
řaznan çya û sara û deşt û doł
syamał nişîn gişt keften we bar
megêłûn pey seyr hewar we hewar
çîn newhałan perê temaşa
ce zosan hewar mekerûn ḧaşa
ew şoxî bêgerd nûrî bînayîm
ew mayey nîşat ew hîwa û şadîm
bê xewer ce min derdim karîyen
seyr û sefay ew pey min řazîyen
şemał fîdat bam to û bałî teyrit
to û boy ’emberîn to û sirwey seyrit
îmşew horêze wer ce sub seḧer
wêt ’ebîrîn ker we mêşk û ’ember
bişo we dumay berkoçî xêłan
ser delîley gel řemî řewî lan
bizan qîblekem wa le kam şarê
ya xo nohewar kam ser hewarê
waçe azîz gyan şay sosen xałan
řehwêley řem kêş polî newhałan
pêkyay pêkan ’îşwe û ẍemzeket
ewgarî bałay şîrîn terzeket
bedbext û ẍemgîn syaçareket
qeys lung we koł çem xumareket
ce şwên wargeket keften xestey derd
bîmar, dił hûnîn, gyan ewgar, řeng zerd
er bîw neçîn zułfeket tabê
nekyanî perêş řehayîş nayê
tikam yen şemał çun biray gyanî
çun dos diłsoz nek we gyanî
řeḧmê ker we êş nałey diłekem
îmşew sa bişo we lay gułekem